കൊല്‍ക്കത്ത: പീഡന പരാതിയില്‍ പശ്ചിമ ബംഗാള്‍ ഗവര്‍ണര്‍ സി.വി ആനന്ദബോസിനെതിരെ സുപ്രീം കോടതിയെ സമീപിക്കാനൊരുങ്ങി ബംഗാള്‍ സര്‍ക്കാര്‍. അന്വേഷണവുമായി ഗവര്‍ണര്‍ സഹകരിക്കാന്‍ ഗവര്‍ണര്‍ വിസമ്മതിച്ചതിനെ തുടര്‍ന്നാണ് സര്‍ക്കാര്‍ നീക്കം. ഭരണ ഘടനയുടെ പരിരക്ഷ ദുരുപയോഗം ചെയ്യാനാണ് ഗവര്‍ണര്‍ ശ്രമിക്കുന്നതെന്ന് ബംഗാള്‍ സര്‍ക്കാര്‍ ആരോപിച്ചു. തനിക്കെതിരായ അന്വേഷണത്തില്‍ സഹകരിക്കരുതെന്ന് കഴിഞ്ഞ ദിവസം ഗവര്‍ണര്‍ രാജ്ഭവന്‍ ജീവനക്കാര്‍ക്ക് നിര്‍ദേശം നല്‍കിയിരുന്നു. 

ഭരണഘടനയുടെ 361ാം അനുച്ഛേദം പ്രകാരം ഗവര്‍ണര്‍ക്കെതിരെ സര്‍ക്കാരുകള്‍ക്ക് ഒരു നടപടിയും സ്വീകരിക്കാനാവില്ല. ഈ പ്രത്യേക ആനുകൂല്യം ദുരുപയോഗം ചെയ്താണ് പശ്ചിമ ബംഗാള്‍ നിയമനടപടികളില്‍ നിന്ന് രക്ഷപ്പെടുന്നത്. 

അതേസമയം പരാതി ലഭിച്ചതോടെ സ്വന്തം നിലക്ക് പ്രത്യേക അന്വേഷണ സംഘത്തെ നിയോഗിച്ച് അന്വേഷവുമായി മുന്നോട്ട് പോവുകയാണ് ബംഗാള്‍ പൊലിസ്. ഗവര്‍ണറുടെ നിസഹകരണം കൂടി ചേര്‍ത്ത് റിപ്പോര്‍ട്ടുണ്ടാക്കി കോടതയില്‍ സമര്‍പ്പിക്കാനാണ് പൊലിസ് ഒരുങ്ങുന്നത്. എന്നാല്‍ പൊലിസ് നടപടികള്‍ അവകാശ ലംഘനമാണെന്ന് ചൂണ്ടിക്കാട്ടി ഗവര്‍ണര്‍ക്കും നിയമനടപടികളിലേക്ക് കടക്കാവുന്നതാണ്. ബംഗാളില്‍ ജൂണ്‍ ഒന്നുവരെ വോട്ടെടുപ്പുള്ളതിനാല്‍ വിഷയം തെരഞ്ഞെടുപ്പ് കഴിയുംവരെ നീണ്ടുപോകാനാണ് സാധ്യത.