ഡല്‍ഹി: മദ്യനയക്കേസില്‍ അറസ്റ്റിലായ ഡല്‍ഹി മുഖ്യമന്ത്രി അരവിന്ദ് കെജ്‌രിവാളിനെതിരായ ആദ്യ കുറ്റപത്രം എന്‍ഫോഴ്സ്മെന്റ് ഡയറക്ടറേറ്റ് നാളെ സമര്‍പ്പിക്കും. കേസില്‍ കെജ്‌രിവാളിനെ പ്രതിയെന്ന് രേഖപ്പെടുത്തുന്നത് ഇതാദ്യമായിരിക്കും. കെജ്‌രിവാളിന്റെ ഇടക്കാല ജാമ്യത്തില്‍ വെള്ളിയാഴ്ച സുപ്രിംകോടതി വാദം കേള്‍ക്കുന്ന സാഹചര്യത്തിലാണ് ഇഡിയുടെ നീക്കം.

ജസ്റ്റിസ് സഞ്ജീവ് ഖന്നയുടെ നേതൃത്വത്തിലുള്ള ബെഞ്ച് അഡീഷണല്‍ സോളിസിറ്റര്‍ ജനറല്‍ എസ്.വി. രാജുവിനെയാണ് ഇക്കാര്യം അറിയിച്ചത്. ചൊവ്വാഴ്ച വാദം കേട്ട കേസില്‍ വിധി പറയാന്‍ മാറ്റിവച്ചിരുന്നു. കുറ്റപത്രത്തില്‍ കെജ്‌രിവാളിനെ 'സൂത്രധാരന്‍' (Kingpin) മദ്യനയക്കേസിലെ പ്രധാന ഉപജാപകനെന്നുമായിരിക്കും ഇഡി വിശേഷിപ്പിക്കുക എന്നാണ് റിപ്പോര്‍ട്ടുകള്‍.

കെജ്‌രിവാളിന് തിരഞ്ഞെടുപ്പ് പ്രചാരണത്തിനായി ഇടക്കാല ജാമ്യം നല്‍കുമെന്ന സൂചന വാദം കേള്‍ക്കലിനിടെ സുപ്രിംകോടതി നല്‍കിയിരുന്നു. തെരഞ്ഞെടുപ്പ് പ്രചാരണത്തിന് മാത്രമാണ് ഇടക്കാല ജാമ്യം അനുവദിക്കുന്നതെന്നും ജാമ്യം ലഭിക്കുകയാണെങ്കില്‍ ഔദ്യോഗിക ചുമതല നിര്‍വഹിക്കരുതെന്നും ബെഞ്ച് അറിയിക്കുകയും ചെയ്തു.

തെരഞ്ഞെടുപ്പ് ഘട്ടമായതിനാല്‍ മാത്രമാണ് ഇടക്കാല ജാമ്യത്തെക്കുറിച്ച് ആലോചിക്കുക പോലും ചെയ്യുന്നത്. അല്ലെങ്കില്‍ അറസ്റ്റിനെതിരായ കെജ്‌രിവാളിന്റെ ഹരജി പരിഗണിക്കുന്നതുമായി ബന്ധപ്പെട്ട് മുന്നോട്ടുപോകുമെന്നും കോടതി അറിയിച്ചിരുന്നു.