ന്യൂഡല്‍ഹി: സുപ്രീം കോടതി ബാര്‍ അസോസിയേഷന്‍  (എസ്.സി.ബി.എ) പ്രസിഡന്റായി മുതിര്‍ന്ന അഭിഭാഷകനും കോണ്‍ഗ്രസ് നേതാവുമായ കപില്‍ സിബലിനെ തെരഞ്ഞെടുത്തു. ആകെ പോള്‍ ചെയ്ത വോട്ടില്‍ കപില്‍ സിബലിന് 1066 വോട്ടുകള്‍ ലഭിച്ചു. രണ്ടാമതെത്തിയ എതിര്‍ സ്ഥാനാര്‍ഥി പ്രദീപ് റായി  689 വോട്ടുകള്‍ നേടി. കപില്‍ സിബലിന് 377 വോട്ടുകളുടെ ഭൂരിപക്ഷം. 

ഇത് നാലാം തവണയാണ് കപില്‍ സിബല്‍ ബാര്‍ അസോസിയേഷന്‍ പ്രസിഡന്റായി തെരഞ്ഞെടുക്കപ്പെടുന്നത്. 2001ലായിരുന്നു അവസാന വിജയം. അതിനുമുമ്പ് 1995-96, 1997-98 കാലത്തും അധ്യക്ഷനായിരുന്നു. നിലവിലെ അധ്യക്ഷനായ അദീഷ് അഗര്‍വാള്‍ നാലാം സ്ഥാനത്തേക്ക് വീണു. പ്രിയ ഹിംഗോറിണി മൂന്നാം സ്ഥാനത്തെത്തി. മറ്റ് തസ്തികകളിലേക്കുള്ള മത്സരഫലങ്ങള്‍ പുറത്തുവിട്ടിട്ടില്ല. 

ഇന്ന് രാവിലെ 10 മുതല്‍ വൈകീട്ട് അഞ്ച് വരെയാണ് വോട്ടെടുപ്പ് നടന്നത്. മെയ് 9 വരെയായിരുന്നു നാമനിര്‍ദേശ പത്രിക സമര്‍പ്പിക്കാനുള്ള അവസരം. മുതിര്‍ന്ന അഭിഭാഷകന്‍ ജയ്ദീപ് ഗുപ്ത ചെയര്‍മാനും മുതിര്‍ന്ന അഭിഭാഷകരായ മീനാക്ഷി അറോറ, റാണ മുഖര്‍ജി എന്നിവര്‍ അംഗങ്ങളുമായ സമിതിയാണ് തിരഞ്ഞെടുപ്പ് നിയന്ത്രിച്ചത്. ആകെ ആറ് പേരാണ് മത്സരരംഗത്തുണ്ടായിരുന്നത്. അഡ്വ. നീരജ് ശ്രീവാസ്തവ, മുന്‍ പ്രസിഡന്റ് ആദിഷ് ചന്ദ്ര അഗര്‍വാല, അഡ്വ. ത്രിപുരാരി റേ എന്നിവരായിരുന്നു മറ്റ് മത്സരാര്‍ഥികള്‍.