രാജ്യത്തെ പാർലമെന്റ് തിരഞ്ഞെടുപ്പിൽ അഞ്ചാം ഘട്ട വോട്ടെടുപ്പ് ഇന്ന് നടക്കും. 6 സംസ്ഥാനങ്ങളിലും രണ്ട് കേന്ദ്രഭരണ പ്രദേശങ്ങളിലും ആണ് വോട്ടെടുപ്പ്. ഇതിൽ ആകെ 49 മണ്ഡലങ്ങൾ ഉൾപ്പെടുന്നു. 94,732 പോളിംഗ് ബൂത്തുകളുമുണ്ട്. ഇന്ന് 9 കോടിയോളം വോട്ടർമാർ വിധിയെഴുതും. ഇതോടൊപ്പം ഒഡീഷയിലെ 35 അസംബ്ലി സീറ്റുകളിലേക്കും ഇന്ന് തിരഞ്ഞെടുപ്പ് നടക്കും.

രാജ്യത്തുടനീളം വിവിധ മണ്ഡലങ്ങളിലായി 9.4 ലക്ഷം പേരെയാണ് തിരഞ്ഞെടുപ്പ് ഡ്യൂട്ടിക്കായി വിന്യസിച്ചിട്ടുള്ളത്. ഇരുമുന്നണികളും വിജയ പ്രതീക്ഷകളിലാണ്. മഹാരാഷ്ട്രയിലും ബീഹാറിലും കോൺഗ്രസ് മികച്ച മത്സരം കാഴ്ച വെക്കുമെന്നാണ് ഇന്ത്യാ സഖ്യം കണക്കുകൂട്ടുന്നത്. രാഹുൽ ഇത്തവണ മത്സരിക്കുന്ന റായ്ബറേലിയിലും വിജയ പ്രതീക്ഷ വാനോളമാണ്.

രാഹുലിനു പുറമേ രാജ്നാഥ് സിംഗ്, സ്മൃതി ഇറാനി, ഒമർ അബ്ദുല്ല, പിയൂഷ് ഗോയൽ തുടങ്ങിയ പ്രമുഖരും ഇന്നാണ് ജനവിധി തേടുന്നത്. രാവിലെ ഏഴ് മണിയോടെയാണ് വോട്ടിങ് ആരംഭിക്കുന്നത്. മണ്ഡലങ്ങളിലെ മൊത്തം ജനസംഖ്യയിൽ പുരുഷ വോട്ടർമാരാണ് കൂടുതൽ.