പള്ളിക്കല്‍: രേഖകളില്ലാതെ മണ്ണു കയറ്റിപ്പോകുന്ന ടിപ്പര്‍ ലോറികള്‍ തേഞ്ഞിപ്പലം പൊലിസ് പിടികൂടി. കോഴിക്കോടു നിന്നും പെരുമ്പാവൂരിലേക്കു കുന്നിടിച്ച മണ്ണുമായി പോകുന്ന അഞ്ചു ടിപ്പര്‍ ലോറികളാണു ദേശീയ പാതയില്‍ സര്‍വകലാശാലക്കടുത്തു വെച്ചു തേഞ്ഞിപ്പലം പൊലിസിന്റെ പിടിയിലായത്. കോഴിക്കോട് ജില്ലയിലെ കുറ്റിക്കാട്ടൂരില്‍ നിന്നും 15 കിലോ മീറ്റര്‍ ദൂരമുള്ള പന്തീരങ്കാവിലേക്കുള്ള കഴിഞ്ഞ 27നു കാലാവധി കഴിഞ്ഞ പാസ് ഉപയോഗിച്ചാണ് ഇവര്‍ മണ്ണ് കടത്താന്‍ ശ്രമിച്ചതെന്ന് പൊലിസ് പറഞ്ഞു. തേഞ്ഞിപ്പലം എസ്.ഐ കെ ഉണ്ണികൃഷ്ണന്‍, സി.പി.ഒ മാരായ സന്തോഷ്, പ്രതാപ് എന്നിവരാണ് വാഹനങ്ങള്‍ കസ്റ്റഡിയിലെടുത്തത്. വാഹനങ്ങള്‍ ഇന്നലെ ജിയോളജി വിഭാഗത്തിനു കൈമാറി.