ദുബൈ: വിവിധ ഉല്‍പന്നങ്ങള്‍ക്ക് 17,000 ദിര്‍ഹം വരെ വിലക്കിഴിവോടെ ദുബൈ പുതിയ നോല്‍ കാര്‍ഡ് അവതരിപ്പിച്ചു. 19 ദിര്‍ഹം ബാലന്‍സുള്ള കാര്‍ഡിന് ഒരുവര്‍ഷത്തേക്ക് തുടക്കത്തില്‍ 200 ദിര്‍ഹം ആണ് വില. വര്‍ഷാവസാനം 150 ദിര്‍ഹത്തിന് പുതുക്കാം. വിനോദസഞ്ചാരികള്‍, താമസക്കാര്‍, പൗരന്മാര്‍ എന്നിവര്‍ക്കായി വിവിധ ഉല്‍പന്നങ്ങള്‍ വാങ്ങുമ്പോഴും മറ്റു സേവനങ്ങള്‍ക്കും 17,000 ദിര്‍ഹം വരെ കിഴിവുള്ള പുതിയ നോല്‍ കാര്‍ഡാണ് പുറത്തിറക്കിയത്.

റോഡ്സ് ആന്‍ഡ് ട്രാന്‍സ്പോര്‍ട്ട് അതോറിറ്റി (ആര്‍.ടി.എ) അനുസരിച്ച് നോല്‍ ട്രാവല്‍ കാര്‍ഡ് ഉടമകള്‍ക്ക് പുതുതായി പുറത്തിറക്കുന്ന കാര്‍ഡിന് വിവിധ ആനുകൂല്യങ്ങളും കിഴിവുകളുമുള്ള സ്വന്തം പാക്കേജുകളുണ്ടാകുമെന്ന് ഓട്ടോമേറ്റഡ് കളക്ഷന്‍ സിസ്റ്റംസ് ഡിപ്പാര്‍ട്ട്മെന്റ് ഡയരക്ടര്‍ സലാഹല്‍ദീന്‍ അല്‍മര്‍സൂഖി പറഞ്ഞു. ഭാവിയില്‍ നിലവിലുള്ള നോല്‍ കാര്‍ഡുകളില്‍ നിന്ന് പുതുതായി ലോഞ്ച് ചെയ്യുന്ന നോല്‍ ട്രാവല്‍ കാര്‍ഡിലേക്ക് ബാലന്‍സ് മാറ്റുന്നതിനുള്ള സാധ്യതയെക്കുറിച്ച് ആര്‍.ടി.എ പഠിക്കുമെന്ന് അല്‍മര്‍സൂഖി വാര്‍ത്താസമ്മേളനത്തില്‍ പറഞ്ഞു. നിലവില്‍ 100ല്‍ അധികം പങ്കാളികളും റസ്റ്ററന്റുകള്‍, വിനോദ കേന്ദ്രങ്ങള്‍ എന്നിവിടങ്ങളില്‍ ഈ കാര്‍ഡ് സ്വീകരിക്കുന്നുണ്ടെന്നും അവ സമയബന്ധിതമായി വര്‍ധിക്കുമെന്നും എം.ഡി.എക്സ് സൊല്യൂഷന്‍സ് മാനേജിങ് ഡയരക്ടര്‍ അമര്‍ അബ്ദുല്‍സമദ് പറഞ്ഞു.