രാജ്യത്ത് മൊബൈല്‍ ഫോണ്‍ സേവന നിരക്കുകള്‍ കൂടുന്നു. ഏറ്റവും കൂടുതല്‍ ഉപഭോക്താക്കളുള്ള ജിയോ ആണ് നിരക്ക് വര്‍ധനയ്ക്ക് തുടക്കമിട്ടിരിക്കുന്നത്. 12.5 ശതമാനം മുതല്‍ 25 ശതമാനം വരെ നിരക്ക് വര്‍ധിപ്പിച്ചിരിക്കുകയാണ് ജിയോ. ജൂലായ് മൂന്നു മുതലാണ് വര്‍ധന.
ജിയോയുടെ ചുവടു പിടിച്ച് എയര്‍ടെലും വോഡഫോണ്‍-ഐഡിയയുമെല്ലാം നിരക്ക് വര്‍ധിപ്പിക്കാനുള്ള നീക്കത്തിലാണെന്നാണ് സൂചന.

പ്രതിദിനമാസവാര്‍ഷിക പ്ലാനുകള്‍ക്കെല്ലാം വില വര്‍ധിക്കുമെന്നാണ് റിപ്പോര്‍ട്ട്. ജിയോയുടെ ജനപ്രിയമായ പ്ലാനുകളിലാണ് കൂടുതല്‍ നിരക്ക് വര്‍ധന. 209 രൂപയുടെ ജനപ്രിയമായ പ്ലാനിന് ഇനി 249 രൂപ നല്‍കേണ്ടി വരും. ഈ പ്ലാനില്‍ നിത്യേന ഒരു ജിബി ഡാറ്റയാണ് ലഭിക്കുക. 28 ദിവസത്തെ വാലിഡിറ്റിയുമുണ്ടാവും.  239 രൂപയുടെ പ്ലാനിന് 299 രൂപ (ഒന്നര ജിബി ഡാറ്റ 28 ദിവസം)  299 രൂപയുടെ പ്ലാനിന് 349 രൂപ, 349 രൂപയുടെ പ്ലാനിന് 399 രൂപ,  399 രൂപയുടെ പ്ലാനിന് 499 രൂപ എന്നിങ്ങനെയാണ് വര്‍ധന. എല്ലാം 28 ദിവസത്തെ പ്ലാനാണ്. മൂന്ന് ജിബി വരെയാണ് പ്രതിദിനം ഈ പ്ലാനുകളില്‍ ലഭിക്കുക.

നിരക്ക് വര്‍ധനയ്ക്ക് പുറമെ 5ജി അണ്‍ലിമിറ്റഡ് ആക്‌സസും വെട്ടിച്ചുരുക്കും. രണ്ടര വര്‍ഷത്തിന് ശേഷം ഇതാദ്യമായാണ് മൊബൈല്‍ നിരക്കുകള്‍ ജിയോ വര്‍ധിപ്പിക്കുന്നത്. നിലവില്‍ 47 കോടിയിലെറെ ഉപഭോക്താക്കളാണ് ജിയോയ്ക്കുള്ളത്. സ്‌പെട്രം ലേലത്തിന് പിന്നാലെയാണ് നിരക്ക് വര്‍ധന കമ്പനി പ്രഖ്യാപിച്ചത്. 5ജിയിലും എ.ഐ സാങ്കേതിക വിദ്യയിലും കൂടുതല്‍ നിക്ഷേപം നടത്തുമെന്ന് റിലയന്‍സ് ജിയോ ഇന്‍ഫോകോം ചെയര്‍മാന്‍ ആകാശ് അംബാനി പ്രസ്താവനയില്‍ വ്യക്തമാക്കി.