പാലക്കാട്: ഏറെ നാളെത്തെ ആവശ്യത്തിന് പിന്നാലെ മലബാറിലെ ഹൃസ്വദൂര യാത്രക്കാർക്കായി സ്പെഷ്യൽ ട്രെയിൻ അനുവദിച്ച് റെയിൽവേ. ഷൊർണൂർ - കണ്ണൂർ റൂട്ടിലാണ് ട്രെയിൻ ഓടുക. മലബാറിലെ ട്രെയിൻ യാത്രകളിൽ ബുദ്ധിമുട്ട് അനുഭവിക്കുന്ന യാത്രക്കാർക്ക് ആസ്വാകരമായ തീരുമാനമാണ് ഉണ്ടായിരിക്കുന്നത്. ആഴ്ചയിൽ നാല്‌ ദിവസമാണ് തുടക്കത്തിൽ ട്രെയിൻ ഓടുക.

ചൊവ്വ, ബുധൻ, വ്യാഴം, വെള്ളി ദിവസങ്ങളിലായിരിക്കും ട്രെയിൻ ഉണ്ടാവുക. 06031 ട്രെയിൻ ഷൊർണൂരിൽ നിന്നും വൈകീട്ട് 3:40ന് പുറപ്പെട്ട്  5:35ന് കോഴിക്കോട് എത്തും. 7:40 ന് കണ്ണൂരിൽ എത്തും.

ബുധൻ, വ്യാഴം, വെള്ളി, ശനി ദിവസങ്ങളിൽ 06032 ട്രെയിൻ രാവിലെ 8:10ന് കണ്ണൂരിൽ നിന്ന് പുറപ്പെട്ട് 9:50ന് കോഴിക്കോട് എത്തും. തുടർന്ന് ഷൊർണൂരിലേക്ക് പുറപ്പെടും. പട്ടാമ്പി, കുറ്റിപ്പുറം, തിരൂർ, താനൂർ, പരപ്പനങ്ങാടി, ഫറോക്ക്, കൊയിലാണ്ടി, വടകര, മാഹി, തലശ്ശേരി എന്നിവിടങ്ങളിൽ ട്രെയിനിന് സ്റ്റോപ്പ് അനുവദിച്ചിട്ടുണ്ട്.

ഓഫീസ് ജീവനക്കാർക്കും വിദ്യാർഥികൾക്കും ഉപകാരമാകുന്ന രീതിയിലാണ് സമയക്രമം. ഏറെ തിരക്കുള്ള പരശുറാം എസ്പ്രസിന് പിന്നാലെയാണ് രാവിലെയും വൈകീട്ടും സർവിസ് എന്നതിനാൽ യാത്രക്കാർക്ക് സ്പെഷ്യൽ ട്രെയിൻ ഏറെ ഉപകാരപ്പെടും. ഇതിൽ തന്നെ, കണ്ണൂർ - കോഴിക്കോട് യാത്രക്കാർക്ക് ആകും കൂടുതൽ സൗകര്യപ്രദം.