ചേളാരി: സമസ്ത കേരള ജംഇയ്യതുൽ മുഅല്ലിമീൻ സെൻട്രൽ കൗൺസിൽ മദ്‌റസാ വിദ്യാർഥികൾക്കായി 24.9 ലക്ഷം രൂപയുടെ സ്മരണാ അവാർഡ് പ്രഖ്യാപിച്ചു. പൊതുപരീക്ഷയിൽ എല്ലാ വിഷയത്തിലും ഫസ്റ്റ് ക്ലാസിൽ പാസാകുന്നതോടൊപ്പം 556 റെയ്ഞ്ചുകളിലായി ഏറ്റവും കൂടുതൽ മാർക്ക് നേടിയ 2143 വിദ്യാർഥികൾക്കാണ് അവാർഡ്.  

സമസ്ത കേരള ജംഇയ്യതുൽ ഉലമയുടെ നേതാക്കളായിരുന്ന, കെ.ടി മാനു മുസ് ലിയാരുടെ സ്മരണാർഥം മദ്‌റസ പ്ലസ്ടു ക്ലാസിൽ 381 വിദ്യാർഥികൾക്ക് 2000 രൂപാ വീതവും ശംസുൽ ഉലമ ഇ.കെ. അബൂബക്കർ മുസ് ലിയാർ, കെ.പി ഉസ്മാൻ സാഹിബ് എന്നിവരുടെ സ്മരണാർഥം 10ാം തരത്തിൽ 532 വിദ്യാർഥികൾക്ക് 1500 രൂപാ വീതവും കെ.കെ അബൂബക്കർ ഹസ്‌റത്ത്, കെ.വി മുഹമ്മദ് മുസ് ലിയാർ കൂറ്റനാട്, പി. അബൂബക്കർ നിസാമി എന്നിവരുടെ സ്മരണാർഥം 7ാം തരത്തിൽ 619 വിദ്യാർഥികൾക്ക് 1000 രൂപാ വീതവുമാണ് നൽകുക. 
ഈ വർഷം മുതൽ 5ാം തരത്തിൽ 611 വിദ്യാർഥികൾക്ക് 500 രൂപാ വീതം എം.കെ.എ കുഞ്ഞിമുഹമ്മദ് മുസ് ലിയാർ, പി.കെ.പി അബ്ദുസ്സലാം മുസ് ലിയാർ, സി.കെ.എം സ്വാദിഖ് മുസ് ലിയാർ എന്നിവരുടെ സ്മരണാർഥവും നൽകും. 

റെയ്ഞ്ച് കമ്മിറ്റികൾക്ക് വെബ്‌സൈറ്റിൽ ലഭ്യമാക്കിയ ലിസ്റ്റ് പ്രകാരം അവാർഡ് തുക നൽകുമെന്ന് പ്രസിഡന്റ് ഡോ. ബഹാഉദ്ദീൻ മുഹമ്മദ് നദ് വിയും ജനറൽ സെക്രട്ടറി വാക്കോട് മൊയ്തീൻകുട്ടി ഫൈസിയും അറിയിച്ചു. അവസാന തീയതി 2024 ഡിസംബർ 31.