കൊച്ചി: കൊച്ചി മെട്രോയില്‍ യാത്രക്കാരുടെ എണ്ണത്തില്‍ വന്‍ വര്‍ധന. ആറുമാസത്തിനിടെ യാത്രക്കാരുടെ എണ്ണം ഒരുകോടിയിലേറെയായി ഉയര്‍ന്നു. ജനുവരി ഒന്നുമുതല്‍ ജൂണ്‍ 30വരെ 1,64,27,568 യാത്രക്കാരാണ് കൊച്ചി മെട്രോയില്‍ യാത്രചെയ്തത്. ഈമാസം ഒന്നുമുതല്‍ 11വരെ 11,99,354പേരാണ് യാത്രചെയ്തത്. കഴിഞ്ഞ പത്ത് ദിവസമായി കൊച്ചി മെട്രോയ്ക്ക് പ്രതിദിനം ലക്ഷത്തിലധികം യാത്രക്കാരെയാണ് ലഭിച്ചത്.

ദിനംപ്രതി യാത്രക്കാരുടെ എണ്ണം കൂടിവരുന്നതിനാല്‍ സര്‍വീസുകളുടെ എണ്ണം വര്‍ധിപ്പിക്കാനും കൊച്ചി മെട്രോ റെയില്‍ ലിമിറ്റഡ് (കെ.എം.ആര്‍.എല്‍) തീരുമാനിച്ചു. ജൂലൈ 15മുതലായിരിക്കും ട്രെയിനുകളുടെ എണ്ണം വര്‍ധിപ്പിക്കുക. ദിവസവും 12 അധികസര്‍വീസുകളായിരിക്കും നടത്തുക. യാത്രക്കാരുടെ തിരക്ക് ലഘൂകരിക്കാനും ട്രെയിനുകള്‍ക്കിടയിലുള്ള കാത്തിരിപ്പ് സമയം കുറയ്ക്കാനും അധിക സര്‍വീസുകള്‍ ഏര്‍പ്പെടുത്തിയതിലൂടെ സാധ്യമാകുമെന്ന് കൊച്ചിമെട്രോ അധികൃതര്‍ അറിയിച്ചു.

നിലവില്‍ തിരക്കേറിയ സമയങ്ങളായ രാവിലെ എട്ടുമണിമുതല്‍ പത്ത് മണിവരെയും വൈകുന്നേരം നാലുമണിമുതല്‍ ഏഴുമണിവരെയും രണ്ട് ട്രെയിനുകള്‍ തമ്മിലുള്ള ഇടവേള സമയം ഏഴ് മിനിറ്റും 45സെക്കന്‍ഡുമാണ്. എന്നാല്‍ അധിക സര്‍വീസുകള്‍ നിലവില്‍വരുന്നതോടെ ട്രെയിനുകള്‍ തമ്മിലുള്ള ഇടവേള സമയം ഏഴ് മിനിറ്റായി ചുരുങ്ങും.