മലപ്പുറം: സുപ്രഭാതം ദിനപത്രത്തിന്റെ 11ാമത് കാംപയിന്‍  സജീവമാക്കാന്‍ തീരുമാനിച്ച് ജില്ലകള്‍ തോറും നേതൃസംഗമങ്ങള്‍.സമസ്ത പോഷകഘടകങ്ങളുടെ യൂനിറ്റ് തലം മുതലുള്ള ഭാരവാഹികള്‍ കാംപയിനില്‍ വരിക്കാരാകാന്‍ തീരുമാനമെടുത്ത് മലപ്പുറം ഈസ്റ്റ് ജില്ലാ നേതൃസംഗമം. ഓഗസ്റ്റ് ഒന്നുമുതല്‍ ആരംഭിക്കുന്ന കാംപയിനില്‍ സമസ്ത പോഷകഘടകങ്ങളുടെ യൂനിറ്റ്, റെയ്ഞ്ച്, ക്ലസ്റ്റര്‍, മേഖല, ജില്ലാ തലങ്ങളിലെ ഭാരവാഹികള്‍ വരിചേരും. കാംപയിന്‍ മുന്നൊരുക്ക പ്രവര്‍ത്തനങ്ങള്‍ക്ക് തുടക്കമിട്ട് കഴിഞ്ഞ ദിവസം മലപ്പുറം സുന്നി മഹലില്‍ ചേര്‍ന്ന ജില്ലാ നേതൃസംഗമത്തിലാണ് ഈ മാതൃകാ പ്രവർത്തനം. കാംപയിന്‍ പ്രവര്‍ത്തനങ്ങള്‍ ഏകോപിപ്പിക്കുന്നതിന് സമസ്തയുടെയും പോഷകഘടകങ്ങളുടെയും  ഭാരവാഹികളുടെ നേതൃത്വത്തിലുള്ള കാംപയിന്‍ സമിതി നേതൃത്വം നല്‍കും. ഇതിനു കീഴില്‍ മേഖലാ കണ്‍വന്‍ഷനുകള്‍ക്ക് കഴിഞ്ഞദിവസം തുടങ്ങി. തുടര്‍ന്ന് റെയ്ഞ്ച് തലത്തിലും മദ്‌റസാ തലത്തിലും കണ്‍വന്‍ഷനുകള്‍ ചേരും. 

കഴിഞ്ഞ ദിവസം മലപ്പുറം സുന്നി മഹലില്‍ ചേര്‍ന്ന ഈസ്റ്റ് ജില്ലാ സമസ്ത നേതൃസംഗമത്തില്‍ സമസ്തയുടെയും പോഷകഘടകങ്ങളുടെയും സംസ്ഥാന, ജില്ലാ ഭാരവാഹികള്‍ കാംപയിന്‍ വിളംബരത്തില്‍ പങ്കാളികളായി. മലപ്പുറം ഗവേണിങ് ബോഡി ചെയര്‍മാന്‍ അബ്ദുസ്സമദ് പൂക്കോട്ടൂര്‍ അധ്യക്ഷനായി. സമസ്ത ജില്ലാ സെക്രട്ടറി ഇ. മൊയ്തീൻ ഫൈസി പുത്തനഴി ഉദ്ഘാടനം ചെയ്തു. സമസ്ത മുശാവറ അംഗങ്ങളായ വാക്കോട് മൊയ്തീന്‍കുട്ടി ഫൈസി, അസ്ഗറലി ഫൈസി പട്ടിക്കാട്, ഡോ. സി.കെ അബ്ദുറഹ്മാന്‍ ഫൈസി, സുപ്രഭാതം മാനേജിങ് ഡയരക്ടര്‍ അബ്ദുല്‍ ഹമീദ് ഫൈസി അമ്പലക്കടവ്, എസ്.വൈ.എസ് സംസ്ഥാന വൈസ് പ്രസിഡന്റ് കെ.എ റഹ്മാന്‍ ഫൈസി, ഡയരക്ടര്‍ കെ. മോയിന്‍കുട്ടി മാസ്റ്റര്‍, ഡയരക്ടര്‍ യൂസുഫ് മമ്പാട്ടുമൂല, കാംപയിന്‍ കോഡിനേറ്റര്‍ കൊടക് അബ്ദുറഹ്മാന്‍ മുസ്ലിയാര്‍ തുടങ്ങിയവരും മലപ്പുറം  ഈസ്റ്റ് ജില്ലയിലെ സമസ്ത, ജംഇയ്യതുല്‍  മുഅല്ലിമീൻ, എസ്.വൈ.എസ്, എസ്.എം.എഫ്, ജംഇയ്യതുല്‍ മുദരിസീന്‍, ജംഇയ്യതുല്‍ ഖുത്വബാ, മദ്‌റസാ മാനേജ്‌മെന്റ് അസോ, എസ്.കെ.എസ്.എസ്.എഫ്, എസ്.ഇ.എ, പ്രവാസി സെല്‍ തുടങ്ങി ഘടകങ്ങളുടെ ഭാരവാഹികളും പങ്കാളികളായി.