പ്യോങ്‌യാങ്: ഉത്തര കൊറിയന്‍ ഭരണാധികാരി കിം ജോങ് ഉന്നിനെ വിമര്‍ശിച്ച രണ്ടു മുതിര്‍ന്ന ഉദ്യോഗസ്ഥരെ വിമാനവേധ തോക്കുപയോഗിച്ച് കൊലപ്പെടുത്തിയതായി റിപ്പോര്‍ട്ട്. കൃഷി മന്ത്രി, വിദ്യാഭ്യാസ വകുപ്പിലെ ഉന്നത ഉദ്യോഗസ്ഥനായ റി യോങ് ജന്‍ എന്നിവരെ കൊലപ്പെടുത്തിയതായാണ് ദക്ഷിണ കൊറിയന്‍ പത്രം ജൂങ്ഓങ് ലബോ റിപ്പോര്‍ട്ട് ചെയ്തത്.

പ്യോങ്‌യാങിലെ സൈനിക അക്കാദമിയില്‍ ഇരുവരേയും പരസ്യമായി കൊലപ്പെടുത്തുകയായിരുന്നുവെന്നാണ് വാര്‍ത്ത. കിം ജോങ് ഉന്നിന്റെ ഉത്തരവിനെ തുടര്‍ന്നാണ് ഇവരെ കൊലപ്പെടുത്തിയത്. ഈ മാസം ആദ്യത്തില്‍ നടത്തിയ വധത്തെ കുറിച്ചുള്ള വിവരങ്ങള്‍ ഇപ്പോഴാണ് പുറത്തുവരുന്നത്. എന്നാല്‍ ഇത് ദക്ഷിണ കൊറിയ സ്ഥിരീകരിച്ചിട്ടില്ല.

ഇവരെ അറസ്റ്റു ചെയ്ത ശേഷം സുരക്ഷാ ഉദ്യോഗസ്ഥര്‍ ചോദ്യം ചെയ്തു. തുടര്‍ന്ന് അഴിമതി ഉള്‍പ്പെടെയുള്ള കുറ്റങ്ങള്‍ ചുമത്തി വധിക്കുകയായിരുന്നു. കിമ്മിന്റെ നേതൃത്വത്തെ ചോദ്യം ചെയ്തതാണ് വധ ശിക്ഷയ്ക്ക് കാരണമായതെന്നാണ് റിപ്പോര്‍ട്ട്. 2011 ല്‍ അധികാരത്തിലെത്തിയ ശേഷം കിം ഇത്തരത്തില്‍ കൊലപാതകങ്ങള്‍ നടത്തിയിരുന്നു.