തൃശ്ശൂർ: ബൈക്കിൻ്റെ ചക്രത്തിൽ സാരി കുടുങ്ങിയുണ്ടായ അപകടത്തിൽ പരുക്കേറ്റ് ചികിത്സയിലായിരുന്ന സ്ത്രീ മരിച്ചു. മതിലകം കളരിപറമ്പ് സ്വദേശി ശ്രീനാരായണപുരത്ത് വീട്ടിൽ സുനിലിൻ്റെ ഭാര്യ നളിനി (55) യാണ് മരിച്ചത്. പെരിഞ്ഞനം കപ്പേളക്കടുത്ത് ദേശീയ പാതയിൽ കഴിഞ്ഞ ചൊവ്വാഴ്ച്ചയായിരുന്നു അപകടം. 

മകനോടൊപ്പം ബൈക്കിൽ പോകവേയാണ് പിന്നിൽ ഇരുന്നിരുന്ന നളിനിയുടെ സാരി ബൈക്കിൻ്റെ ചക്രത്തിൽ ചുറ്റിപ്പിടിച്ച് അപകടമുണ്ടായത്. പിന്നാലെ റോഡിലേക്ക് തെറിച്ചു വീണ ഇവർക്ക് ഗുരുതരമായി പരുക്കേറ്റിരുന്നു. തൃശൂർ ജൂബിലി മിഷൻ ആശുപത്രിയിൽ ചികിത്സയിലായിരുന്നു ഇവർ. ഇതിനിടെ ഇന്ന് ഉച്ചയോടെയായിരുന്നു അന്ത്യം.