അബുദബി: യു.എ.ഇയിൽ ഈ വർഷം 100 ഇലക്ട്രിക് കാർ റീചാർജിങ് (ഇ.വി) സ്റ്റേഷനുകൾകൂടി നിർമിക്കും. 2030നകം ചാർജിങ് സ്‌റ്റേഷനുകളുടെ എണ്ണം 1000 ആക്കുകയാണ് ലക്ഷ്യം. യു.എ.ഇയിലെ എമിറേറ്റ്സ് ട്രാൻസ്പോർട്ട് കെട്ടിടങ്ങളിൽ ഇ.വി ചാർജിങ് ‌സ്റ്റേഷനുകൾ സ്ഥാപിക്കുന്നതിനായി ഊർജ ഇൻഫ്രാസ്ട്രക്‌ചർ മന്ത്രാലയവും എമിറേറ്റ്സ് ട്രാൻസ്പോർട്ടും സഹകരിക്കും.

ഇലക്ട്രിക് വാഹനങ്ങളെ പ്രോത്സാഹിപ്പിച്ച് കാർബൺ ബഹിർഗമനം കുറക്കുക എന്നത് യു.എ.ഇയുടെ പ്രഖ്യാപിത നയങ്ങളിലൊന്നാണ്. ഗ്രീൻ മൊബിലിറ്റിയെ പിന്തുണച്ച് 2050 ഓടെ രാജ്യത്തെ മൊത്തം വാഹനങ്ങളിൽ 50 ശതമാനവും ഇ.വിയിലേക്ക് മാറ്റും. രാജ്യത്തുടനീളം ഇതിനായുള്ള അടിസ്ഥാന സൗകര്യങ്ങൾ വിപുലീകരിക്കുമെന്ന് ഊർജ പെട്രോളിയം കാര്യ അണ്ടർ സെക്രട്ടറി ഷരീഫ് അൽ ഒലാമ വ്യക്തമാക്കി.

ഇൻ്റർനാഷനൽ എനർജി ഏജൻസിയുടെ റിപ്പോർട്ട് പ്രകാരം ഇലക്ട്രിക് കാറുകളുടെ വിൽപനയിൽ മിഡിലീസ്റ്റിൽ രണ്ടാം സ്ഥാനത്താണ് യു.എ.ഇ. കഴിഞ്ഞ വർഷം മൊത്തം കാർ വിൽപനയിൽ 13 ശതമാനവും ഇലക്ട്രിക് കാറുകളായിരുന്നു.

കൂടുതൽ ഗൾഫ് വാർത്തകൾക്ക് ഈ ഗ്രൂപ്പിൽ ജോയിൻ ചെയ്യുക