തിരുവനന്തപുരം: സംസ്ഥാനത്ത് കാട്ടാനകളുടെ എണ്ണത്തില്‍ നേരിയ കുറവുണ്ടെന്ന് റിപ്പോര്‍ട്ട്. കേരളത്തിലെ വനമേഖലയിലുള്ളത് 1,793 കാട്ടാനകളെന്നാണ് വനംവകുപ്പിന്റെ കണക്കെടുപ്പില്‍ കണ്ടെത്തിയത്. മെയ് 23, 24, 25 തീയതികളിലാണ് കണക്കെടുപ്പ് നടത്തിയത്. 2023ലെടുത്ത കണക്കെടുപ്പില്‍ 1,920 കാട്ടാനകളുണ്ടായിരുന്നെന്നും ഇത്തവണ 127 കാട്ടാനകളുടെ കുറവുണ്ടെന്നും മന്ത്രി എ.കെ ശശീന്ദ്രന്‍ പറഞ്ഞു. കുറഞ്ഞതിന്റെ കാരണങ്ങള്‍ പരിശോധിക്കുമെന്നും മന്ത്രി അറിയിച്ചു.

ബ്ലോക്ക് കൗണ്ടില്‍ ഒറ്റയാന്‍ ഉള്‍പ്പെടെ 384 ആനക്കൂട്ടങ്ങളെ കാണുകയും 1073 ആനകളെ നേരിട്ടുള്ള പരിശോധനയില്‍ കണ്ടെത്തുകയും ചെയ്തു. നേരിട്ടെണ്ണിയതില്‍ 81 എണ്ണത്തിനെ തരംതിരിക്കാനായിട്ടില്ല. ബാക്കിയുള്ള 992 ആനകളില്‍ മുതിര്‍ന്ന ആനകള്‍ 61 ശതമാനവും അതില്‍ താഴെയുള്ളവ 18 ശതമാനവും കുട്ടിയാനകള്‍ 20 ശതമാനവുമാണ്. സംസ്ഥാനത്തെ 9622.708 ചതുരശ്ര കിലോമീറ്ററിലുള്ള വനമേഖലയില്‍ ആനകളുള്ളതായി കണ്ടെത്തിയ 3499.52 ചതുരശ്ര കിലോമീറ്റര്‍ പ്രദേശങ്ങളെ നാല് മുതല്‍ 7.09 ചതുരശ്ര കിലോമീറ്റര്‍ വരെയുള്ള 608 സാമ്പിള്‍ ബ്ലോക്കുകളായി തിരിച്ചാണ് കണക്കെടുത്തത്.

പെരിയാര്‍ സങ്കേതത്തിലാണ് ഏറ്റവുമധികം ആനകളെ കണ്ടെത്തിയത്. 813 ആനകളാണ് ഇവിടെയുള്ളത്. ആനമുടിയില്‍ 615, നിലമ്പൂരില്‍ 198, വയനാട്ടില്‍ 78 ആനകളും ഉണ്ടെന്നാണാണ് കണ്ടെത്തല്‍. എണ്ണത്തില്‍ വയനാട്ടില്‍ 29 ശതമാനവും ആനമുടിയില്‍ 12 ശതമാനവും കുറവുണ്ടായിട്ടുണ്ട്. വയനാട്ടിലെ കുറവിന് പ്രധാനകാരണം കാലാവസ്ഥയിലുണ്ടായ മാറ്റമാണ്.