തിരുവനന്തപുരം: എയ്ഡഡ് അധ്യാപകരുടെ നിയമനം പിഎസ്‌സിക്ക് വിടണമെന്ന നിര്‍ദേശവുമായി ഖാദര്‍ കമ്മിറ്റി റിപോര്‍ട്ട്. പിഎസ്‌സി അല്ലെങ്കില്‍ നിയമനത്തിന് പ്രത്യേക ബോര്‍ഡ് വേണമെന്നും നിര്‍ദേശമുണ്ടെന്നും എന്നാല്‍ റിപോര്‍ട്ട് മന്ത്രിസഭ അംഗീകരിച്ചെങ്കിലും നിര്‍ദേശങ്ങളില്‍ സര്‍ക്കാര്‍ ഇതുവരെ തീരുമാനമെടുത്തിട്ടില്ല. ഗുണമേന്മയുള്ള വിദ്യാഭ്യാസം സംബന്ധിച്ച ശുപാര്‍ശകള്‍ക്കായി നിയോഗിച്ച കമ്മിറ്റിയാണ് ഖാദര്‍ കമ്മിറ്റി.

രാവിലെ എട്ട് മുതല്‍ ഉച്ചയ്ക്ക് ഒരു മണി വരെയാക്കി സ്‌കൂള്‍ സമയം ക്രമീകരിക്കണമെന്നും ഖാദര്‍ കമ്മിറ്റി ശുപാര്‍ശ ചെയ്തിരുന്നു. പ്രാദേശിക ആവശ്യങ്ങള്‍ പരിഗണിച്ച് സമയം ക്രമീകരിക്കാമെന്നും റിപോര്‍ട്ടില്‍ പറയുന്നുണ്ട്. നിലവില്‍ സര്‍ക്കാര്‍ സ്‌കൂളുകള്‍ ഒന്‍പതര മുതല്‍ മൂന്നര വരെയോ 10 മണി മുതല്‍ 4 മണി വരെയോ ആണ് പ്രവര്‍ത്തിക്കുന്നത്. എന്നാല്‍, ഈ സമയത്തില്‍ മാറ്റം വരുത്തുന്നത് സംബന്ധിച്ച് നിലവില്‍ അജണ്ടയിലില്ലെന്നായിരുന്നു വിദ്യാഭ്യാസ മന്ത്രിയുടെ മറുപടി.