കൊച്ചി: ഹേമ കമ്മിറ്റി റിപ്പോര്‍ട്ട് പുറത്ത് വിടാമെന്ന് ഹൈക്കോടതി. റിപ്പോര്‍ട്ട് പുറത്തുവിടരുതെന്ന് ആവശ്യപ്പെട്ടുള്ള ഹരജി ഹൈക്കോടതി തളളി. നിര്‍മാതാവ് സജിമോന്‍ പാറയില്‍ നല്‍കിയ ഹരജിയാണ് തള്ളിയത്. റിപ്പോര്‍ട്ട് ഏകപക്ഷീയമായതിനാല്‍ പുറത്തുവിടരുതെന്ന ആവശ്യമാണ് നിരസിച്ചത്. ജസ്റ്റിസ് വിജി അരുണാണ് ഹരജി പരിഗണിച്ചത്. 

റിപ്പോര്‍ട്ട് പുറത്തുവിടുന്നത് വ്യക്തികളുടെ സ്വകാര്യതയെ പ്രതികൂലമായി ബാധിക്കുമെന്നാണ് ഹരജിക്കാരന്‍ ഉന്നയിക്കുന്ന വാദം. ആരോപണ വിധേയരായവരുടെ ഭാഗം കേള്‍ക്കാതെയാണ് റിപ്പോര്‍ട്ട് തയാറാക്കിയതെന്നും സജിമോന്‍ ഹരജിയില്‍ ചൂണ്ടിക്കാണിക്കുന്നു. എന്നാല്‍ ഹരജിക്കാരന് ഇക്കാര്യത്തില്‍ ചോദ്യം ചെയ്യാനുള്ള നിയമപരമായ അവകാശമില്ലെന്നാണ് വിവരാവകാശ കമ്മീഷന്റെ നിലപാട്. വ്യക്തിപരമായ പരാമര്‍ശങ്ങള്‍ ഒഴിവാക്കി റിപ്പോര്‍ട്ട് പ്രസിദ്ധീകരിക്കാമെന്ന നിലപാടാണ് വിവരാവകാശ കമ്മിഷനും സംസ്ഥാന സാംസ്‌കാരിക വകുപ്പും കോടതിയില്‍ സ്വീകരിച്ചത്.

സിനിമയിലെ സ്ത്രീകളുടെ കൂട്ടായ്മയായ വിമന്‍ ഇന്‍ സിനിമ കളക്ടീവും (ഡബ്‌ള്യൂ.സി.സി) വനിതാ കമ്മിഷനും ഹരജിയില്‍ കക്ഷി ചേര്‍ന്നിരുന്നു. റിപ്പോര്‍ട്ട് പുറത്തുവിടണമെന്ന് ഡബ്‌ള്യൂ.സി.സി കോടതിയില്‍ ആവശ്യപ്പെട്ടിട്ടുണ്ട്. ഹരജിക്കാരന്റെ നടപടി ഏറെ സംശയാസ്പദമെന്നാണ് ഡബ്‌ള്യൂ.സി.സി കോടതിയില്‍ വാദിച്ചത്.