മലപ്പുറം: എസ്പിയുടെ ഔദ്യോഗിക വസതിയില്‍ എത്തിയ നിലമ്പൂര്‍ എംഎല്‍എ പി വി അന്‍വറിനെ പൊലിസ് തടഞ്ഞു.  എസ്പിയുടെ വസതിയില്‍ നിന്നും മരം മുറിച്ചെന്ന പരാതി അന്വേഷിക്കാനാണ് എംഎല്‍എ എത്തിയത്. എന്നാല്‍ പാറാവ് ഡ്യൂട്ടിയില്‍ നിന്ന പൊലീസ് ഉദ്യോഗസ്ഥന്‍ എംഎല്‍എയെ വസതിയിലേക്ക് കടത്തിവിട്ടില്ല. സംഭവത്തിന്റെ ദൃശ്യങ്ങളും പുറത്തുവന്നു. 

എസ്പി കുടുംബവുമായി താമസിക്കുന്ന വീടായതിനാല്‍ കയറ്റി വിടാന്‍ അനുവാദമില്ലെന്നാണ് ഉദ്യോഗസ്ഥന്‍ പറഞ്ഞത്. എസ്പി അദ്ദേഹത്തിന്റെ ഓഫീസില്‍ ചെന്ന് കാണണമെന്നും പറഞ്ഞു. ആരോടും അനുമതി ചോദിക്കേണ്ട കാര്യം തനിക്കില്ലെന്നും വെട്ടിയ മരത്തിന്റെ കുറ്റി കാണാനാണ് താന്‍ വന്നത് എന്നും എംഎല്‍എ മറുപടി പറഞ്ഞു. അനുവാദം ഇല്ലാതെ കടത്തി വിടാന്‍ ആകില്ലെന്ന് അറിയിച്ചതിന് പിന്നാലെ എംഎല്‍എ മടങ്ങി.

കഴിഞ്ഞ ദിവസം പൊതുവേദിയില്‍ പി വി അന്‍വര്‍ മലപ്പുറം എസ് പിയെ അധിക്ഷേപിച്ച് പ്രസംഗിച്ചത് വിവാദമായിരുന്നു. സംഭവത്തിന് പിന്നാലെ അന്‍വറിനെതിരെ ഐപിഎസ് അസോസിയേഷന്‍ പ്രമേയം പാസാക്കുകയും ചെയ്തിരുന്നു. ഐപിഎസ് ഉദ്യോഗസ്ഥരെ പി വി അന്‍വര്‍ പൊതുവില്‍ അപകീര്‍ത്തിപ്പെടുത്താനാണ് തീരുമാനിച്ചതെന്നാണ് പ്രമേയത്തില്‍ പറയുന്നത്. പി വി അന്‍വര്‍ നടത്തിയ പ്രസ്താവന പിന്‍വലിച്ച് പൊതുമധ്യത്തില്‍ മാപ്പ് പറയണമെന്നാണ് ഐപിഎസ് അസോസിയേഷന്റെ പ്രമേയത്തില്‍ ആവശ്യപ്പെട്ടത്. ഇതിന് പിന്നാലെ ഐപിഎസ് അസോസിയേഷനെ പരിഹസിച്ച് പിവി അന്‍വര്‍ എംഎല്‍എ രംഗത്തെത്തിയതും വലിയ വാര്‍ത്തയായിരുന്നു.

police stopped PV Anwar who reached SPs residence in Malappuram