മുംബൈ: ഗുഡ്‌സ് ട്രെയിനിനു മുകളില്‍ കയറി റീല്‍ ചിത്രീകരിച്ച യുവാവ് ഷോക്കേറ്റു മരിച്ചു. 16 കാരനായ 
ബേലാപൂര്‍ സ്വദേശി ആരവ് ശ്രീവാസ്തവയാണ് മരണപ്പെട്ടത്. നവി മുംബൈയിലെ നെരുള്‍ റെയില്‍വേ സ്റ്റേഷനിലായിരുന്നു സംഭവം. ജൂലൈ ആറാം തിയതി റീല്‍ ചിത്രീകരിക്കുന്നതിനു വേണ്ടി സുഹൃത്തുക്കളോടൊപ്പമാണ് ആരവ് നവി മുംബൈയിലെ നെരുള്‍ റെയില്‍വേ സ്റ്റേഷനിലത്തിയത്.

 ബോഗിയുടെ മുകളില്‍ കയറി നിന്നു കൊണ്ടാണ് ആരവ് റീലെടുക്കാന്‍ ശ്രമിച്ചത്. ഇതിനിടെ മുകളിലൂടെ പോകുന്ന വൈദ്യുതി ലൈനില്‍ കൈ തട്ടി ഷോക്കേല്‍ക്കുകയും ഉടന്‍ തന്നെ താഴേക്കു വീഴുകയുമായിരുന്നു. കുട്ടിയുടെ തലയിലും ശരീരത്തിന്റെ മറ്റു ഭാഗങ്ങളിലും ഗുരുതരമായി പരിക്കേറ്റിട്ടുണ്ട്.

 60 ശതമാനത്തിലധികം പൊള്ളലേറ്റതായാണ് റെയില്‍വേ പൊലിസ് അറിയിച്ചത്. തൊട്ടടുത്തുള്ള ആശുപത്രിയില്‍ പ്രവേശിപ്പിച്ച കുട്ടിയെ പിന്നീട് ഗുരുതരാവസ്ഥയെ തുടര്‍ന്ന് ഐറോളിലെ ആശുപത്രിയിലേക്ക് മാറ്റുകയായിരുന്നു. ആറുദിവസം ചികിത്സയില്‍ കഴിഞ്ഞെങ്കിലും കുട്ടിയുടെ ജീവന്‍ രക്ഷിക്കാനായില്ല. അപകടമരണത്തിനു കേസെടുത്ത പൊലിസ് കൂടുതല്‍ അന്വേഷണം ആരംഭിച്ചിട്ടുണ്ട്.