ചോറ് ഒരു നേരമെങ്കിലും കഴിക്കാത്ത മലയാളികള്‍ വളരെ കുറവാണ്. ഉണ്ടാക്കാന്‍ വളരെ എളുപ്പമാണെങ്കിലും പലപ്പോഴും ചോറ് അമിതമായി വേവുന്നതും ചിലപ്പോള്‍ വേവ് കുറയുന്നതുമൊക്കെ വീടുകളിലാണെങ്കിലും സ്ഥിരം സംഭവമാണ്. എന്നാല്‍ ഇനി ചോറ് കൂടുതല്‍ വെന്തുപോയി എന്ന് കരുതി വിഷമിക്കേണ്ടതില്ല. വെന്ത് കുഴഞ്ഞുപോയ ചോറ് ശരിയാക്കാന്‍ ചില പൊടിക്കൈകള്‍ പരീക്ഷിക്കാവുന്നതാണ്.

ചോറു വയ്ക്കുമ്പോള്‍ അരി കൂടുതല്‍ വെന്തുപോയാല്‍ അതില്‍ തണുത്ത വെള്ളവും അല്‍പം നെയ്യും ഒഴിച്ച് കുറച്ച് നേരം അടച്ചു വയ്ക്കുക. ശേഷം ഊറ്റുക. എന്നിട്ട് ഒരു പരന്ന പാത്രത്തില്‍ കാറ്റ് കൊള്ളുന്ന രീതിയില്‍ ചോറ് പരത്തിവയ്ക്കുക. അങ്ങനെ വച്ചാല്‍ കുഴഞ്ഞ അവസ്ഥ മാറിക്കിട്ടും.

ചോറിന് അരി വേവിയ്ക്കുന്നതിന് മുന്‍പ് അല്‍പനേരം തിളച്ച വെള്ളത്തില്‍ ഇട്ടുവയ്ക്കുക. ഇത് അരി വെന്ത് കുഴയുന്നത് ഇല്ലാതാക്കാന്‍ സഹായിക്കുന്നതാണ്. കുറച്ച് ഉപ്പ് ചേര്‍ത്ത് ചോറ് ഊറ്റിയാല്‍ ചോറിന് നല്ല ഉറപ്പ് കിട്ടുന്നതാണ്. അരി തിളപ്പിക്കുമ്പോള്‍ തന്നെ അതിലേക്ക് കുറച്ച് ഉപ്പ് ചേര്‍ക്കുന്നത് ചോറ് കുഴയാതിരിക്കാനും പൊടിയാതിരിക്കാനും സഹായിക്കുന്നു.

ഇനി നെയ്‌ച്ചോറ് ഉണ്ടാക്കുയാണെങ്കില്‍ ചോറ് കുഴയാതിരിക്കാന്‍ അരി അര മണിക്കൂര്‍ വെള്ളത്തില്‍ കുതിര്‍ത്തുവച്ചതിന് ശേഷം പാകം ചെയ്തു നോക്കൂ. കറക്ടായിരിക്കും.