തിരുവനന്തപുരം: പെരിയാര്‍ കടുവാ സങ്കേതത്തെ ജനവാസ മേഖലയില്‍ നിന്ന് ഒഴിവാക്കണമെന്ന് കേരളം. ഇക്കാര്യം വീണ്ടും കേന്ദ്രസര്‍ക്കാരിനോട് ആവശ്യപ്പെടാനാണ് കേരള സര്‍ക്കാറിന്റെ തീരുമാനം. 502 ഹെക്ടര്‍ ജനവാസ മേഖല ഒഴിവാക്കണമെന്നാണ് കേരളത്തിന്റെ ആവശ്യം. മുഖ്യമന്ത്രി പിണറായി വിജയന്റെ അധ്യക്ഷതയില്‍ ചേര്‍ന്ന സംസ്ഥാനവന്യജീവി ബോര്‍ഡ് യോഗത്തിലാണ് തീരുമാനമാനം. ഇക്കാര്യം നേരത്തേയും കേരളം ആവശ്യപ്പെട്ടിരുന്നു.

പമ്പാവാലി/ ഏയ്ഞ്ചല്‍വാലി സെറ്റില്‍മെന്റുകളിലെ 502.723 ഹെക്ടറോളം വരുന്ന ജനവാസമേഖല കടുവാ സങ്കേതത്തില്‍ നിന്നും ഒഴിവാക്കണമെന്നാണ് ആവശ്യം. ഇതിനായി കേന്ദ്ര സര്‍ക്കാര്‍ ആവശ്യപ്പെട്ട അധിക വിവരങ്ങള്‍ ഉള്‍പ്പെടെ ചേര്‍ത്ത് ശുപാര്‍ശ സമര്‍പ്പിക്കും. ഈ മാസം 9ന് ചേരുന്ന ദേശീയ വന്യജീവി ബോര്‍ഡ് യോഗത്തില്‍ ഈ വിഷയം പരിഗണിക്കാനാണ് മുഖ്യമന്ത്രി അടിയന്തര യോഗം വിളിച്ചത്.   

തട്ടേക്കാട് പക്ഷി സങ്കേതത്തില്‍ നിന്ന് 8.9725 ച.കി.മീ. ജനവാസമേഖല ഒഴിവാക്കി മൂന്നാര്‍ ഡിവിഷനില്‍ നിന്ന് 10.1694 ച.കി.മീ. റിസര്‍വ് വനമേഖല പക്ഷി സങ്കേതത്തില്‍ ഉള്‍പ്പെടുത്താനുള്ള കേരള സര്‍ക്കാര്‍ നിര്‍ദ്ദേശവും ദേശീയ വന്യജീവി ബോര്‍ഡ് സ്റ്റാന്റിങ് കമ്മിറ്റിയുടെ അംഗീകാരത്തിനായി വീണ്ടും സമര്‍പ്പിക്കും.

വനം വകുപ്പ് മന്ത്രി എ.കെ ശശീന്ദ്രന്‍, എംഎല്‍എമാരായ സെബാസ്റ്റ്യന്‍ കുളത്തുങ്കല്‍, വി. ശശി, അഡീഷണല്‍ ചീഫ് സെക്രട്ടറി കെ. ആര്‍. ജ്യോതിലാല്‍, വനം വകുപ്പ് മേധാവി ഗംഗ സിങ്, ചീഫ് വൈല്‍ഡ് ലൈഫ് വാര്‍ഡന്‍ പ്രമോദ് ജി. കൃഷ്ണന്‍ എന്നിവര്‍ യോഗത്തില്‍ പങ്കെടുത്തു.

Kerala reiterates its request to the Centre to relocate human settlements from the Periyar Tiger Reserve, aiming to protect the fragile ecosystem and ensure the well-being of both humans and wildlife.