മുംബൈ: മഹാരാഷ്ട്ര മുന്‍ മന്ത്രിയും എന്‍.സി.പി നേതാവുമായ ബാബാ സിദ്ധീഖിയുടെ കൊലപാതകത്തില്‍ അറസ്റ്റിലായ പ്രതികള്‍ക്ക് ഗുണ്ടാത്തലവന്‍ ലോറന്‍സ് ബിഷ്‌ണോയിയുമായി ബന്ധമെന്ന് പൊലിസ്. ലോറന്‍സ് ബിഷ്‌ണോയിയുടെ സംഘത്തിലെ അംഗങ്ങളാണെന്ന് പ്രതികള്‍ സമ്മതിച്ചതായി മുംബൈ പൊലിസ് അറിയിച്ചു. കഴിഞ്ഞ ഒരു മാസത്തോളമായി പ്രതികള്‍ പ്രദേശത്ത് നിരീക്ഷണം നടത്തിവരികയായിരുന്നെന്നും പൊലിസ് പറയുന്നു. 

ശനിയാഴ്ച രാത്രിയാണ് ബാബ സിദ്ദീഖിയെ മുംബൈയിലെ ബാന്ദ്ര മേഖലയില്‍ മൂന്ന് പേര്‍ വെടിവച്ച് കൊലപ്പെടുത്തിയത്. നിര്‍മല്‍ നഗറിലെ ബാന്ദ്രയിലെ എംഎല്‍എയും മകനുമായ സീഷന്‍ സിദ്ദീഖിയുടെ ഓഫിസിന് പുറത്തുവച്ചാണ് 66കാരനായ ബാബാ സിദ്ദീഖി ആക്രമിക്കപ്പെട്ടത്.

കൊലപാതകം നടത്താനായി മൂന്നു പേരാണ് ഓട്ടോറിക്ഷയില്‍ എത്തിയത്. തുടര്‍ന്ന് അവസരം ഒത്തുകിട്ടാനായി കാത്തിരുന്നു. ഒടുവില്‍ രാത്രി 9.15നും 9.20നും ഇടയില്‍ അദ്ദേഹത്തിന്റെ മകന്റെ ഓഫിസിനു സമീപത്തുവച്ച് വെടിയുതിര്‍ക്കുകയായിരുന്നു. കാറില്‍ കയറുന്നതിനിടെയായിരുന്നു പ്രതികള്‍ വെടിവച്ചത്. ഉടന്‍ തന്നെ മുബൈയിലെ ലീലാവതി ആശുപത്രിയില്‍ എത്തിച്ചെങ്കിലും മരണം സ്ഥിരീകരിച്ചു.

സംഭവത്തില്‍ രണ്ട് പേരെ അറസ്റ്റ് ചെയ്തതായും മൂന്നാമനായി തിരച്ചില്‍ ഊര്‍ജിതമാണെന്നും പൊലിസും മുഖ്യമന്ത്രി ഏക്‌നാഥ് ഷിന്‍ഡെയും അറിയിച്ചു. ഹരിയാന സ്വദേശി കര്‍ണൈല്‍ സിങ്, യുപി സ്വദേശി ധര്‍മരാജ് കശ്യപ് എന്നിവരാണ് പിടിയിലായത്. വെടിവെപ്പിന് ഉപയോഗിച്ച 9.9 എംഎം പിസ്റ്റളും ഇവരില്‍നിന്ന് കണ്ടെടുത്തിട്ടുണ്ട്. 

രക്ഷപെട്ട മൂന്നാമത്തെയാളില്‍ നിന്ന് കൂടുതല്‍ വിവരങ്ങള്‍ ലഭിക്കുമെന്ന പ്രതീക്ഷയിലാണ് പൊലീസ് സംഘം. കേസന്വേഷണവുമായി ബന്ധപ്പെട്ട് അഞ്ച് സംഘത്തെ രൂപീകരിച്ചിട്ടുണ്ടെന്ന് പൊലീസ് അറിയിച്ചു.

 15 ദിവസം മുമ്പ് ബാബ സിദ്ദീഖിക്ക് വധഭീഷണിയുണ്ടായിരുന്നുവെന്ന് പൊലീസ് പറയുന്നു. തുടര്‍ന്ന് അദ്ദേഹത്തിന്റെ സുരക്ഷ വൈ കാറ്റഗറിയിലേക്ക് ഉയര്‍ത്തിയിരുന്നു.