മലപ്പുറം: ലഹരിമുക്ത കേരളത്തിനായി സർക്കാർ ചെലവിട്ടത് 66 കോടി രൂപ. ലഹരിക്കെതിരേ വിമുക്തി ബോധവൽക്കരണത്തിനായാണ് 66,74,84,108 രൂപ ചെലവഴിച്ചത്. സ്‌കൂൾ, കോളജ്, ആദിവാസി, തീരദേശ മേഖലകൾ, അതിഥി തൊഴിലാളികൾ ഉൾപ്പെടെയുള്ള മേഖലകളിൽ വിവിധ സംഘടനകളുടെ നേതൃത്വത്തിലാണ് ബോധവൽക്കരണ പ്രവർത്തനങ്ങൾ നടത്തിവരുന്നത്. ലഹരിക്കെതിരേ സ്റ്റാളുകൾ, സെമിനാറുകൾ, സന്ദേശയാത്രകൾ, പത്രപരസ്യങ്ങൾ, സ്‌കൂളുകളിലെ ലഹരിവിരുദ്ധ ക്ലബുകളുടെ രൂപീകരണം അടക്കമുള്ള വിവിധ പ്രവൃത്തികൾക്കാണ് ഫണ്ട് ചെലവഴിച്ചത്. 

അതേസമയം, സംസ്ഥാനത്ത് ലഹരിമുക്തി തേടി ചികിത്സയ്ക്കെത്തിയത് നാലര വർഷത്തിനിടെ 1.08 ലക്ഷം പേരാണ്. ഇവരിൽ ഏറെയും യുവാക്കളും വിദ്യാർഥികളുമാണ്. വിമുക്തി മിഷന്റെ കീഴിൽ തിരുവനന്തപുരം, എറണാകുളം, കോഴിക്കോട് ജില്ലകളിൽ പ്രവർത്തിക്കുന്ന ഡി അഡിഷൻ സെന്ററുകളിലാണ് 2020 മുതൽ ഇക്കഴിഞ്ഞ ഓഗസ്റ്റ് വരെ 1,08,202 പേർ ചികിത്സ തേടിയെത്തിയത്. നേരിട്ടും ഫോൺ മുഖേനയും ചികിത്സ തേടുന്നവരും കിടത്തിചികിത്സ തേടിയവരും ഇക്കൂട്ടത്തിലുണ്ട്.

 2020ൽ 26,606 പേരാണ് ചികിത്സയ്ക്കെത്തിയത്. 2021ൽ 17,274 പേരായി കുറഞ്ഞെങ്കിലും 2022ൽ 29,301 ആയി കൂടി. കഴിഞ്ഞ വർഷം 26,010 പേരും ഈ വർഷം ഓഗസ്റ്റ് വരെ 17,399 പേരുമാണ് ചികിത്സയ്ക്കെത്തിയത്. എം.ഡി.എം.എ,  എൽ.എസ്.ഡി സ്റ്റാംപ്, മെതാം ഫിറ്റമിൻ, ഹെറോയിൻ, ബ്രൗൺ ഷുഗർ അടക്കമുള്ള സിന്തറ്റിക് ലഹരിക്ക് അടിമകളായവരാണ് കൂടുതൽ പേരും. 
മറ്റു ലഹരിയേക്കാൾ കൂടുതൽ സമയം ലഹരി നീണ്ടുനിൽകുമെന്നതാണ് സിന്തറ്റിക് മരുന്നുകളെന്നതാണ് ഇവയിലേക്ക് താൽപര്യം കൂടാനുള്ള പ്രാധാനകാരണം.

6 മാസം; സിന്തറ്റിക് ഡ്രഗ്‌സുമായി പിടികൂടിയത്  262 പേരെ

മലപ്പുറം: ഏപ്രിൽ മുതൽ സെപ്റ്റംബർ വരെയുള്ള ആറു മാസത്തിൽ സിന്തറ്റിക് ഡ്രഗ്‌സുമായി പിടിയിലായത് 262 പേർ. ഇതിൽ 43 പേരും കണ്ണൂർ ജില്ലയിൽ നിന്നാണ്. ഇടുക്കി, മലപ്പുറം ജില്ലകളിൽനിന്ന് 34 പേരെയും മയക്കുമരുന്നുമായി അറസ്റ്റ് ചെയ്തു.

പത്തനംതിട്ടയിലാണ് കേസുകൾ റിപ്പോർട്ട് ചെയ്യാത്തത്. തിരുവനന്തപുരം 22, കൊല്ലം 15, ആലപ്പുഴ 5, കോട്ടയം 13, എറണാകുളം 29, തൃശൂർ 10, പാലക്കാട് എട്ട്, കോഴിക്കോട് 15,വയനാട് 31, കാസർക്കോട് 13 എന്നിങ്ങനെയാണ് മറ്റു ജില്ലകളിലെ കണക്ക്.