ഗസ്സ: ആക്രമണം 400 ദിവസം പിന്നിടുമ്പോഴും ഗസ്സയിലെ കൂട്ടക്കുരുതി കരുണയില്ലാതെ തുടര്‍ന്ന് ഇസ്‌റാഈല്‍. ഇന്നലെ 13 കുട്ടികള്‍ ഉള്‍പ്പെടെ 40ലേറെ പേരെയാണ് ജബാലിയ അഭയാര്‍ഥി ക്യാംപില്‍ കൊന്നൊടുക്കിയത്. ഇതിനകം മരണ സംഖ്യ 43,603 ആയി. പരുക്കേറ്റവരുടെ എണ്ണം ഒരു ലക്ഷം കവിയുകയും ചെയ്തു. താമസ കെട്ടിടങ്ങള്‍ക്ക് നേരെയാണ് ഇസ്‌റാഈല്‍ വ്യോമാക്രമണം നടത്തിയത്. ജബാലിയ ക്യാംപില്‍ നിന്ന് മാറിത്താമസിച്ചവരുടെ കെട്ടിടങ്ങളാണ് ബോംബിട്ട് തകര്‍ത്തത്. നിരവധി പേരുടെ മൃതദേഹങ്ങള്‍ ആശുപത്രിയില്‍ നിന്ന് കൊണ്ടുപോകുന്ന ദൃശ്യങ്ങള്‍ സമൂഹ മാധ്യമങ്ങളിലുണ്ട്. ഫലസ്തീന്‍ വാര്‍ത്താ ഏജന്‍സിയായ വഫയാണ് മരണ സംഖ്യ ആണെന്ന് റപ്പോര്‍ട്ട് ചെയ്തത്.

അതേസമയം, ബൈത്ത് ലാഹിയയില്‍ ഗ്രനേഡുകള്‍ ഉപയോഗിച്ച് ഇസ്‌റാഈല്‍ സൈന്യത്തിനു നേരെ ആക്രമണം നടത്തിയെന്ന് ഹമാസ് സായുധ സേന അറിയിച്ചു. ടാങ്ക്വേധ റോക്കറ്റ് ഉപയോഗിച്ച് ടാങ്കുകള്‍ തകര്‍ത്തുവെന്നും 15 ഇസ്‌റാഈല്‍ സൈനികരെ കൊലപ്പെടുത്തിയെന്നും ഹമാസ് അറിയിച്ചു. എന്നാല്‍ സൈനികര്‍ കൊല്ലപ്പെട്ടതായി ഇസ്‌റാഈല്‍ വിവരം പുറത്തുവിട്ടിട്ടില്ല.

ലബനാന് നേരേയും ഇസ്‌റാഈല്‍ ആക്രമണം തുടരുകയാണ്. കഴിഞ്ഞ ദിവസം മാത്രം ഇവിടെ കൊല്ലപ്പെട്ടത് 23ലേറെ ആളുകളാണ്. ബൈറൂത്തിന് വടക്കായി അല്‍മാത് ഗ്രാമത്തിന് നേരെയായിരുന്നു ആക്രമണം. ഇസ്‌റാഈല്‍ ആക്രമണങ്ങളില്‍ ദിനേന 38 പേരെങ്കിലും കൊല്ലപ്പെടുന്നുണ്ടെന്നാണ് ലബനാന്‍ ആരോഗ്യ മന്ത്രാലയത്തിന്റെ കണക്ക്.