കൊട്ടാരക്കര: ബൈക്കില്‍ പിന്തുടര്‍ന്നെത്തി സ്‌കൂട്ടര്‍ യാത്രികയുടെ ബാഗ് തട്ടിയെടുത്ത യുവാവ് പിടിയില്‍. പനവേലി കമ്പോട്ടില്‍വീട്ടില്‍ ലിജിനാ(22)ണ് പിടിയിലായത്. ബുധനാഴ്ച ഉച്ചക്കായിരുന്നു സംഭവം.
സ്‌കൂട്ടറില്‍ പുനലൂരിലേക്ക് പോയ പുനലൂര്‍ ഗ്രേസിങ്‌ബ്ലോക്ക് സ്വദേശിനി മായയുടെ ബാഗാണ് തട്ടിയെടുത്തത്. ബൈക്കില്‍ പിന്തുടര്‍ന്ന് ചെങ്ങമനാട് അരോമാ ആശുപത്രിക്ക് സമീപം ആളൊഴിഞ്ഞ ഭാഗത്തെത്തിയപ്പോള്‍ സ്‌കൂട്ടറിന്റെ ഹാന്‍ഡിലില്‍ തൂക്കിയിരുന്ന ബാഗ് തട്ടിയെടുക്കുകയായിരുന്നു. സ്‌കൂട്ടര്‍ മറിഞ്ഞ് വീട്ടമ്മയ്ക്ക് പരുക്കേല്‍ക്കുകയും ചെയ്തു.
അതിവേഗതയില്‍ ബൈക്കില്‍ പാഞ്ഞ ലിജിനെ നാട്ടുകാരും അതുവഴിയെത്തിയ മറ്റുബൈക്കുകാരും പൊലിസും പിന്തുടര്‍ന്നു. രക്ഷപ്പെടാനുള്ള പാച്ചിലിനിടയില്‍ വാളകത്തിനു സമീപം അമ്പലക്കരയില്‍ ഇയാളുടെ ബൈക്ക് മറിയുകയും പിന്നാലെ എത്തിയവര്‍ പിടികൂടുകയുമായിരുന്നു. ഇയാളുടെ ബൈക്കും പൊലിസ് കസ്റ്റഡിയിലെടുത്തു.
ഇയാള്‍ മുന്‍പ് മാലമോഷണക്കേസിലും പിടിയിലായിട്ടുണ്ടെന്ന് പൊലിസ് പറഞ്ഞു. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.