തിരുവനന്തപുരം: സാങ്കേതിക സര്‍വകലാശാലയിലും ഡിജിറ്റല്‍ സര്‍വകലാശാലയിലും വിസിമാരെ നിയമിച്ച ഗവര്‍ണറുടെ നടപടി ചട്ടലംഘനമെന്ന് സിപിഎം. കോടതി വിധി ലംഘിച്ച് ഗവര്‍ണര്‍ നിയമനം നടത്തിയത് ധിക്കാരമാണെന്നും സര്‍ക്കാര്‍ കൊടുത്ത പട്ടിക ഗവര്‍ണര്‍ അംഗീകരിച്ചില്ലെന്നുമാണ് വിമര്‍ശനം. 

കേരളത്തിലെ വിദ്യാഭ്യാസ-തൊഴില്‍ മേഖലയെ പരിഹസിക്കുകയാണ് ഗവര്‍ണറെന്നും, ഹൈക്കോടതി വിധിയുടെ പരസ്യമായ ലംഘനമാണ് നടന്നതെന്നും സിപിഎം പ്രസ്താവനയില്‍ പറഞ്ഞു. വിഷയത്തില്‍ യു.ഡി.എഫ് നിലപാട് വ്യക്തമാക്കണമെന്നും സിപിഎം ആവശ്യപ്പെട്ടു. 

അതേസമയം വിസി നിയമനത്തിനുള്ള സര്‍ക്കാര്‍ പാനല്‍ വെട്ടിയ ഗവര്‍ണറുടെ നടപടി ഹൈക്കോടതി വിധിക്കും സര്‍വകലാശാല ആക്ടിനും വിരുദ്ധമാണെന്നാണ് ഉന്നതവിദ്യാഭ്യാസമന്ത്രി ആര്‍. ബിന്ദുവിന്റെ വിമര്‍ശനം. സര്‍ക്കാരുമായി ചര്‍ച്ച നടത്താതെ ഏകപക്ഷീയമായാണ് നിയമനം. വ്യവസ്ഥകള്‍ക്ക് അപ്പുറത്തുകൂടി ചാന്‍സിലര്‍ തീരുമാനമെടുക്കുന്നു. കേന്ദ്രസര്‍ക്കാരിന്റെ അജണ്ട നടപ്പാക്കുന്ന പണിയാണ് ചാന്‍സിലര്‍ ചെയ്യുന്നത്. സര്‍ക്കാര്‍ നിയമനടപടിയുമായി മുന്നോട്ടുപോകുമെന്നും മന്ത്രി വ്യക്തമാക്കി.

നേരത്തെ സാങ്കേതിക സര്‍വ്വകലാശാലയില്‍ സര്‍ക്കാര്‍ നല്‍കിയ പാനല്‍ വെട്ടിയ ഗവര്‍ണര്‍ സ്വന്തം നിലയ്ക്ക് വിസിയെ നിയമിച്ചിരുന്നു. മുന്‍ വിസി സജി ഗോപിനാഥ് സ്ഥാനമൊഴിഞ്ഞ് ഒരുമാസം തികയുന്ന ദിവസമാണ് സര്‍വകലാശാലയിലെ സീനിയര്‍ പ്രൊഫസര്‍ ഡോക്ടര്‍ കെ ശിവപ്രസാദിന് താല്‍ക്കാലിക ചുമതല നല്‍കിയത്. 

cpim against kerala governor arif muhammaf khan on vc