പാലക്കാട്: നിയന്ത്രണം വിട്ട ലോറി പാഞ്ഞുകയറി ബസ് സ്റ്റോപ്പില്‍ കിടന്നുറങ്ങുകയായിരുന്നു യുവതി മരിച്ചു. മൈസൂര്‍ സ്വദേശി പാര്‍വതി (40)യാണ് മരിച്ചത്. പാലക്കാട് ചിറ്റൂരിലാണ് ദാരുണ സംഭവമുണ്ടായത്. കൂടെയുണ്ടായിരുന്ന മൂന്നുപേരെ പരുക്കുകളോടെ ജില്ലാ ആശുപത്രിയില്‍ പ്രവേശിപ്പിച്ചു.

ചിറ്റൂര്‍ ആലാംകടവില്‍ വെച്ച് പുലര്‍ച്ചെ മൂന്ന് മണിക്കാണ് സംഭവമുണ്ടായത്. ഇറച്ചിക്കോഴി കയറ്റിവന്ന ലോറി ബസ് കാത്തിരിപ്പ് കേന്ദ്രത്തില്‍ ഇടിച്ച് കയറി മറിയുകയായിരുന്നു. പാര്‍വതിയുടെ ശരീരത്തിലൂടെ ലോറി കയറിയിറങ്ങി. 

അപകടമുണ്ടാക്കിയ ലോറി ഡ്രൈവറെ പൊലീസ് കസ്റ്റഡിയിലെടുത്തു. പ്രദേശത്ത് പൊലിസെത്തി അന്വേഷണം ആരംഭിച്ചു. നാല് ദിവസം മുന്‍പ് തൃശൂര്‍ നാട്ടികയിലുണ്ടായ സമാന അപകടത്തില്‍ 5 പേരുടെ ജീവനാണ് നഷ്ടപ്പെട്ടത്.