മുംബൈ: മഹാരാഷ്ട്ര മുഖ്യമന്ത്രിയായി ദേവേന്ദ്ര ഫഡ്‌നാവിസ് ഇന്ന് സത്യപ്രതിജ്ഞ ചെയ്യും. നിയമസഭാ തെരഞ്ഞെടുപ്പു ഫലം പുറത്തുവന്ന് 12 ദിവസത്തെ അനിശ്ചിതത്വങ്ങള്‍ക്കൊടുവിലാണ് ദേവേന്ദ്ര ഫഡ്‌നാവിസിനെ മഹായുതി സഖ്യത്തിന്റെ മുഖ്യമന്ത്രിയായി ബി.ജെ.പി തീരുമാനിച്ചു. 

സത്യപ്രതിജ്ഞ ഇന്നു വൈകിട്ട് മുംബൈ ആസാദ് മൈതാനിയില്‍ നടക്കും. ഉപമുഖ്യമന്ത്രിമാരായി ഏകനാഥ് ഷിന്‍ഡെ, അജിത് പവാര്‍ എന്നിവരും സത്യപ്രതിജ്ഞ ചെയ്‌തേക്കും. മന്ത്രിമാര്‍ സത്യപ്രതിജ്ഞ ചെയ്യുന്നതില്‍ ഇന്നലെ രാത്രിവരെ തീരുമാനമായിട്ടില്ല.

മുംബൈ വിധാന്‍ സഭ ഹാളില്‍ ചേര്‍ന്ന പാര്‍ട്ടി എം.എല്‍.എമാരുടെ യോഗത്തിനുശേഷം ബി.ജെ.പി കോര്‍ കമ്മിറ്റിയാണ് ഫഡ്‌നാവിസിനെ നേതാവായി തിരഞ്ഞെടുത്തത്. തുടര്‍ന്ന് മഹായുതി സഖ്യ നേതാക്കളായ കാവല്‍ മുഖ്യമന്ത്രി ഏകനാഥ് ഷിന്‍ഡെ(ശിവസേന), അജിത് പവാര്‍(എന്‍.സി.പി) എന്നിവര്‍ക്കൊപ്പം രാജ്ഭവനിലെത്തിയ ഫഡ്‌നാവിസ് സര്‍ക്കാരുണ്ടാക്കാന്‍ ഗവര്‍ണര്‍ സി.പി രാധാകൃഷ്ണനെ സന്ദര്‍ശിച്ച് അവകാശവാദം ഉന്നയിച്ചു.

മുഖ്യമന്ത്രി സ്ഥാനത്തേക്കുള്ള ശിവസേനയുടെ കടുംപിടിത്തത്തെ തുടര്‍ന്നാണ് തീരുമാനം വൈകിയത്. ഭരണത്തുടര്‍ച്ച നേടിയ സര്‍ക്കാരിലെ മുഖ്യമന്ത്രി എന്ന നിലയ്ക്ക് ഒരവസരം തനിക്കു നല്‍കണമെന്ന ആവശ്യം ബി.ജെ.പി നേതൃത്വം പരിഗണിച്ചില്ല. ഇതോടെ ഇടഞ്ഞ ഏകനാഥ് ഷിന്‍ഡെയെ അനുനയിപ്പിക്കുന്നതില്‍ വന്ന കാലതാമസമാണ് സത്യപ്രതിജ്ഞ വൈകാനിടയാക്കിയത്. ഏറ്റവും ഒടുവില്‍ ചൊവ്വാഴ് രാത്രി ഫഡ്‌നാവിസും ഷിന്‍ഡെയും തമ്മില്‍ നടന്ന കൂടിക്കാഴ്ചയിലാണ് ധാരണയിലെത്തിയത്.

Devendra Fadnavis will take the oath as the Chief Minister of Maharashtra today at Azad Maidan in Mumbai.