കൊണ്ടോട്ടി: ഫോക്കസ് ഇന്ത്യയുടെ സഹകരണത്തോടെ മലബാര്‍ ചാരിറ്റബിള്‍ സൊസൈറ്റിയുടെ അഞ്ചാമത് കൊണ്ടോട്ടി മഹോത്സവം നാളെ മുതല്‍ 29 വരെ കൊണ്ടോട്ടി, കുട്ടന്‍കാവില്‍ ഗ്രൗണ്ടില്‍ നടക്കും. ജീവകാരുണ്യ പ്രവര്‍ത്തനങ്ങള്‍ ലക്ഷ്യം വെച്ചുള്ള മഹോത്സവത്തില്‍  കാര്‍ഷിക, വാണിജ്യമേള, അമ്യൂസ്‌മെന്റ്, ആര്‍ട്ടിഫിഷല്‍ കാശ്മീര്‍, ഭക്ഷ്യമേള എന്നിവ നടക്കും. നാളെ വൈകിട്ട് അഞ്ചിന് ടി.വി ഇബ്രാഹിം എം.എല്‍.എ ഉദ്ഘാടനം ചെയ്യും.
വാണിജ്യമേള നഗരസഭ ചെയര്‍മാന്‍ സി നാടിക്കുട്ടിയും കാര്‍ഷികമേള വൈസ് ചെയര്‍പേഴ്‌സണ്‍ കൂനയില്‍ നഫീസയും നിര്‍വഹിക്കും. പ്രദേശത്തെ  എല്‍.പി, യു.പി സ്‌കൂള്‍ വിദ്യാര്‍ഥികള്‍ക്ക് സൗജന്യ പാസുകള്‍ വിതരണം ചെയ്യും. പുളിക്കല്‍ സര്‍വീസ് സഹകരണ ബാങ്കിന്റെ നേതൃത്വത്തിലാണ് കാര്‍ഷികമേള ഒരുക്കുന്നത്. കാര്‍ഷിക ഉല്‍പന്നങ്ങളും, തൈകളും ഓണം, ബലിപെരുന്നാള്‍ പ്രമാണിച്ച് കുറഞ്ഞ നിരക്കില്‍ വസ്തുക്കള്‍ നല്‍കാനുള്ള സൗകര്യവും ഒരുക്കിയിട്ടുണ്ട്. നഗരസഭയുടെ  കിടപ്പിലായ രോഗികള്‍ക്കുള്ള  പരിരക്ഷപദ്ധതിയെ സഹായിക്കുകയാണ് ഇത്തവണത്തെ മഹോത്സവത്തിന്റെ പ്രധാനലക്ഷ്യമെന്ന് സംഘാടകരായ പുലാശ്ശേരി മുസ്തഫ, പി അബ്ദുറഹ്മാന്‍, ഹസീബ് റഹ്മാന്‍, പാമ്പോടന്‍ ബിച്ച, നാസര്‍ ഹാജി പത്രസമ്മേളനത്തില്‍ പറഞ്ഞു.