കല്‍പ്പറ്റ: എന്‍.എം.എസ്.എം ഗവ. കോളജില്‍ നാക് സന്ദര്‍ശനം നടത്തി. കാണ്‍പൂര്‍ ഐ.ഐ.ടി മുന്‍ വൈസ് ചാന്‍സ്‌ലര്‍ പ്രഫ. ഓം വികാസ്, മൈസൂര്‍ സര്‍വകലാശാലയിലെ കൊമേഴ്‌സ് അധ്യാപകരായ പ്രഫ. ജഗദീഷ്, വി.ജി വ്യാസ കോളജ് മുന്‍ പ്രിന്‍സിപ്പല്‍ പ്രഫ. എം.ആര്‍ കുറുപ്പ് എന്നിവര്‍ അടങ്ങിയ സംഘമാണ് സന്ദര്‍ശനം നടത്തിയത്. പ്രിന്‍സിപ്പല്‍ ഇന്‍ ചാര്‍ജ്ജ് പി പ്രിയ, ഐക്യുഎസി കോഡിനേറ്റര്‍ ബഷീര്‍ പൂളക്കല്‍, സ്റ്റുഡന്റ്‌സ് കോഡിനേറ്റര്‍ ആഷിക് എന്നിവരുടെ നേതൃത്വത്തില്‍ നാക് സംഘത്തെ സ്വീകരിച്ചു. പ്രിന്‍സിപ്പലുമായുള്ള കൂടിക്കാഴ്ചക്കിടെ കോളജ് പ്രവര്‍ത്തനങ്ങള്‍ വിവരിച്ചു കൊണ്ടുള്ള പവര്‍ പോയിന്റ് അവതരണവും നടന്നു. വിദ്യാര്‍ഥികളുടെ കലാപരിപാടികള്‍, മാസ് കമ്മ്യൂണിക്കേഷന്‍ വിഭാഗത്തിന്റെ മാഗസിന്‍ പ്രകാശനവും സംഘടിപ്പിച്ചു. നാക് സന്ദര്‍ശനത്തിന് മുന്നോടിയായി പൂര്‍വ വിദ്യാര്‍ഥി സംഘടനയുടെ സഹകരണത്തോടെയുള്ള കാന്റീന്‍ നവീകരണം, ശുചിമുറി നവീകരണം, ക്യാംപസ് റോഡ് നവീകരണം, സൗന്ദര്യ വല്‍ക്കരണം, കാര്‍ബണ്‍ തുലിത പദ്ധതി എന്നി പൂര്‍ത്തീകരിച്ചിരുന്നു. സംസ്ഥാന സര്‍ക്കാര്‍ അനുവദിച്ച 15 ലക്ഷം രൂപയും സിഡിസിയില്‍ നിന്നു ലഭിച്ച 2.8 ലക്ഷം രൂപയും ചെലവിട്ടാണ് നാക് സന്ദര്‍ശനത്തോടനുബന്ധിച്ച ഒരുക്കങ്ങള്‍ നടത്തിയത്.