വിജയപുര: കർണാടകയിലെ വിജയപുര ജില്ലയിൽ നാടിനെ നടുക്കിയ കൂട്ടക്കൊല. രണ്ട് കുടുംബങ്ങൾ തമ്മിലുണ്ടായ ഭൂമിത്തർക്കത്തെ തുടർന്ന് ആറ് പേരെ വെടിവെച്ചും വെട്ടിയും കൊലപ്പെടുത്തി. ചഡച്ചൻ പൊലിസ് സ്റ്റേഷൻ പരിധിയിലെ ഗോവിന്ദപുർ ഗ്രാമത്തിലാണ് ക്രൂരമായ സംഭവം അരങ്ങേറിയത്.

ഗ്രാമവാസികളായ ചന്ദു നിരാലെ, ദുന്ദപ്പ നിരാലെ, ശിവപുത്ര നിരാലെ, രാഹുൽ നിരാലെ, സമർത്ഥ് നിരാലെ, ഷബീർ നദാഫ് എന്നിവരാണ് കൊല്ലപ്പെട്ടത്.

ഗോവിന്ദപുർ ഗ്രാമത്തിലെ നിരാലെ, ഗോളഗി കുടുംബങ്ങൾ തമ്മിൽ ദീർഘകാലമായി ഭൂമിയെച്ചൊല്ലി തർക്കങ്ങൾ നിലനിന്നിരുന്നു. ഇതാണ് ഒടുവിൽ അതിക്രൂരമായ കൂട്ടക്കൊലയിൽ കലാശിച്ചത്. എതിർ കുടുംബാംഗങ്ങളായ ആറ് പേരെയും ആദ്യം വെടിവെച്ച് വീഴ്ത്തുകയായിരുന്നു. അതിനുശേഷം മരണം ഉറപ്പാക്കാനായി മാരകായുധങ്ങൾ ഉപയോഗിച്ച് വെട്ടിക്കൊലപ്പെടുത്തുകയായിരുന്നു എന്നാണ് പുറത്തുവരുന്ന പ്രാഥമിക വിവരങ്ങൾ.

അക്രമത്തിന് പിന്നിൽ ഗോളഗി കുടുംബാംഗങ്ങളാണെന്നാണ് പൊലിസിന്റെ പ്രാഥമിക നിഗമനം. സംഭവത്തിൽ പൊലിസ് അന്വേഷണം ഊർജിതമാക്കിയിട്ടുണ്ടെങ്കിലും പ്രതികളെ ആരെയും ഇതുവരെ അറസ്റ്റ് ചെയ്തിട്ടില്ല. പ്രദേശത്ത് നിലവിൽ കനത്ത പൊലിസ് സുരക്ഷ ഏർപ്പെടുത്തിയിട്ടുണ്ട്.

Six people were brutally killed, some shot and others hacked to death, following a violent clash over a land dispute in Karnataka.