മലയാളി സൂപ്പർതാരം സഞ്ജു സാംസണിന്റെ ബാറ്റിംഗ് ശൈലിയെ പ്രശംസിച്ചുകൊണ്ട് സംസാരിച്ചിരിക്കുകയാണ് മുൻ ഇന്ത്യൻ ബാറ്റിംഗ് കോച്ച് സഞ്ജയ് ബംഗാർ. സഞ്ജുവിന് യുവരാജ് സിംഗിനെ പോലെ സിക്സറടിക്കാൻ സാധിക്കുമെന്നാണ് സഞ്ജയ് ബംഗാർ പറഞ്ഞത്. സ്പോർട്സ് കീടക്ക് നൽകിയ അഭിമുഖത്തത്തിലാണ് സഞ്ജയ് ബംഗാർ സഞ്ജുവിനെക്കുറിച്ച് പറഞ്ഞത്. 

'സഞ്ജു ടോപ്പ് ഓർഡറിൽ ബാറ്റ് ചെയ്യുമ്പോൾ ബാറ്റ് ചെയ്യുമ്പോൾ മത്സരത്തിന്റെ സാഹചര്യങ്ങളെക്കുറിച്ച് വിഷമിക്കേണ്ട ആവശ്യമില്ല. അവന് അനായാസം സിക്സുകൾ അടിക്കാൻ സാധിക്കും. യുവരാജിന് ശേഷം ഇത്തരത്തിൽ സിക്‌സറുകൾ നേടാൻ കഴിവുള്ള ഒരു താരമുണ്ടെങ്കിൽ അത് സഞ്ജുവായിരിക്കും. അവൻ ക്രീസിൽ നിന്നും മികച്ച രീതിയിൽ ബാറ്റ് ചെയ്യുന്നത് തന്നെ കാണാൻ രസമാണ്,' സഞ്ജയ് ബംഗാർ പറഞ്ഞു. 

ഇന്ത്യക്കായി ട്വന്റി ട്വന്റിയിൽ സമീപ കാലങ്ങളിൽ തകർപ്പൻ പ്രകടനമാണ് സഞ്ജു നടത്തിക്കൊണ്ടിരിക്കുന്നത്. ബംഗ്ലാദേശിനെതിരെയുള്ള പരമ്പരയിൽ സഞ്ജു തന്റെ ആദ്യ ടി-20 ഇന്റർനാഷണൽ സെഞ്ച്വറി നേടിയിരുന്നു. പിന്നീട് സൗത്ത് ആഫ്രിക്കക്കെതിരെ നടന്ന ടി-20 പരമ്പരയിൽ രണ്ട് സെഞ്ച്വറികൾ നേടിയും സഞ്ജു തിളങ്ങി.

ഇനി സഞ്ജുവിന്റെ മുന്നിലുള്ളത് ഇംഗ്ലണ്ടിനെതിരെയുള്ള ട്വന്റി ട്വന്റി പരമ്പരയാണ്. ഇംഗ്ലണ്ടിനെതിരെയുള്ള പരമ്പരയിൽ അഞ്ചു ട്വന്റി ട്വന്റിയും മൂന്ന് ഏകദിനവും ആണ് ഉള്ളത്. ജനുവരി 22 മുതൽ ഫെബ്രുവരി രണ്ട് വരെയാണ് ട്വന്റി ട്വന്റി പരമ്പര നടക്കുക. ഇതിനു ശേഷം ഫെബ്രുവരി ആറ് മുതൽ 12 വരെ മൂന്ന് ഏകദിന മത്സരങ്ങളും നടക്കും.