രാജ്കോട്ട്: അയർലാൻഡിനെതിരെയുള്ള മൂന്ന് മത്സരങ്ങളുള്ള ഏകദിന പരമ്പരയിലെ രണ്ടാം മത്സരത്തിൽ റെക്കോർഡ് കൂട്ടുകെട്ടുമായി ഇന്ത്യ. ഓപ്പണിങ്ങിൽ സ്‌മൃതി മന്ദാനയും പ്രതീക റാവലും ചേർന്നാണ് മികച്ച കൂട്ടുകെട്ട് പടുത്തുയർത്തിയത്. രാജ്‌കോട്ടിലെ സൗരാഷ്ട്ര ക്രിക്കറ്റ് സ്റ്റേഡിയത്തിൽ ഇരുവരും ചേർന്ന് ഒന്നാം വിക്കറ്റിൽ 156 റൺസാണ് നേടിയത്. വിമൺസ് ഏകദിനത്തിൽ സ്വന്തം തട്ടകത്തിൽ ഇന്ത്യ നേടുന്ന ഏറ്റവും ഉയർന്ന രണ്ടാമത്തെ കൂട്ടുകെട്ടാണിത്. 

2004ൽ വെസ്റ്റ് ഇൻഡീസിനെതിരെ അഞ്ജു ജെയിനും ജയ ശർമയും നേടിയ 152 റൺസിന്റെ കൂട്ടുകെട്ടിന്റെ റെക്കോർഡാണ് സ്‌മൃതി മന്ദാനയും പ്രതീക റാവലും ചേർന്ന് തകർത്തത്. ഈ നേട്ടത്തിൽ ഒന്നാം സ്ഥാനത്തുള്ളത് ടി കാമിനിയും പൂനം റാവുത്തുമാണ്. 2013ൽ വെസ്റ്റ് ഇൻഡീസിനെതിരെ ഇരുവരും ചേർന്ന് ഓപ്പണിങ്ങിൽ 175 റൺസാണ് നേടിയിരുന്നത്. 

മത്സരത്തിൽ സ്‌മൃതിയും പ്രതീകയും അർദ്ധ സെഞ്ച്വറി നേടി. സ്‌മൃതി 54 പന്തിൽ 73 റൺസാണ് നേടിയത്. 10 ഫോറുകളും രണ്ട് സിക്സുകളും അടങ്ങുന്നതായിരുന്നു താരത്തിന്റെ ഇന്നിംഗ്സ്. റാവൽ എട്ട് ഫോറുകളും ഒരു സിക്‌സും ഉൾപ്പടെ 61 പന്തിൽ 67 റൺസും നേടി മികച്ച പ്രകടനം നടത്തി. 

Smrithi Mandhana And Prathika Rawal Record Partnership For India