തിരുവനന്തപുരം: മുഖ്യമന്ത്രി പിണറായി വിജയനെ കുറിച്ച് സ്തുതി ഗീതമെഴുതിയ കവി ചിത്രസേനന്റെ നിയമനം വിവാദത്തില്‍. ക്ലറിക്കല്‍ അസി. വിരമിച്ച ചിത്ര സേനന് ധനവകുപ്പില്‍ സ്‌പെഷ്യല്‍ മെസഞ്ചറായി നിയമനം നല്‍കുകയായിരുന്നു.നിയമനം ആവശ്യപ്പെട്ട് ചിത്രസേനന്‍ 2024 ഏപ്രില്‍ 25 നാണ് അപേക്ഷ നല്‍കിയത്. എന്നാല്‍ സ്‌പെഷ്യല്‍ മെസഞ്ചറായി നിയമനം നല്‍കി 24 ന് തന്നെ ഉത്തരവിറക്കി. ഇടതുസംഘടനാ സെക്രട്ടറിയായ ഉദ്യോഗസ്ഥനാണ് ഫയല്‍ നീക്കിയത്. 

മുഖ്യമന്ത്രിയെ കുറിച്ചുള്ള സ്തുതി ഗാനം വലിയ രീതിയിലുള്ള വിമര്‍ശനങ്ങള്‍ക്ക് വഴിവെച്ചിരുന്നു. മുഖ്യമന്ത്രി പിണറായി വിജയനെ പുകഴ്ത്തിയാണ് സംഘഗാനം. ഇന്ന് കേരള സെക്രട്ടേറിയറ്റ് എംപ്ലോയീസ് അസോസിയേഷന്‍ സുവര്‍ണ ജൂബിലി മന്ദിരത്തിന്റെ ഉദ്ഘാടനത്തില്‍ മുഖ്യമന്ത്രിയെ വേദിയിലിരുത്തി 100 വനിതാ ജീവനക്കാരാണ് സംഘഗാനം ആലപിക്കുക.

''ചെമ്പടയ്ക്ക് കാവലാള്‍, ചെങ്കനല്‍ കണക്കൊരാള്‍, ചെങ്കൊടിക്കരത്തിലേന്തി കേരളം നയിക്കയായ് '' എന്നു തുടങ്ങുന്ന ധനകാര്യവകുപ്പിലെ പൂവത്തൂര്‍ ചിത്രസേനന്‍ രചിച്ച പാട്ടിന് നിയമവകുപ്പിലെ സെക്ഷന്‍ ഓഫിസര്‍ കെ.എസ് വിമലാണ് സംഗീതം നല്‍കിയത്. സമരധീര സാരഥിയെന്നും പടനായകനെന്നുമെല്ലാം പാട്ടില്‍ മുഖ്യമന്ത്രിയെ വിശേഷിപ്പിക്കുന്നുണ്ട്.

പഠനകാലം പടയുടെ നടുവിലായിരുന്നുവെന്നും അടിയന്തരാവസ്ഥക്കാലത്തെ പീഡനവും കൊവിഡും നിപായും കാലവര്‍ഷക്കെടുതിയും തുടങ്ങി ചൂരല്‍മല മുണ്ടക്കൈ ഉരുള്‍പൊട്ടല്‍ വരെ പാട്ടില്‍ വിഷയമായിട്ടുണ്ട്.

വര്‍ഷങ്ങള്‍ക്ക് മുമ്പ് സി.പി.എം തിരുവനന്തപുരം ജില്ലാ സമ്മേളനത്തിന്റെ ഭാഗമായി പാറശാലയില്‍ പിണറായി സ്തുതിയുമായി മെഗാ തിരുവാതിര അവതരിപ്പിച്ചത് വിവാദമായിരുന്നു. വ്യക്തിപൂജയെ തള്ളിപ്പറയുന്നുവെന്ന് അവകാശപ്പെടുന്ന സി.പി.എം പുതിയ പാട്ടിനോട് ഇതുവരെ നിലപാടെടുത്തിട്ടില്ല.