ഓൾഡ് ട്രാഫോഡ്: ഇംഗ്ലീഷ് പ്രീമിയർ ലീഗിൽ സതാംപ്ടണിനെതിരെ മാഞ്ചസ്റ്റർ യുണൈറ്റഡിന് തകർപ്പൻ ജയം. മത്സരത്തിൽ ഒന്നിനെതിരെ മൂന്ന് ഗോളുകൾക്കായിരുന്നു മാഞ്ചസ്റ്റർ യുണൈറ്റഡിന്റെ വിജയം. ഹാട്രിക് നേടിയ അമദ് ഡയല്ലോയാണ് റെഡ് ഡെവിൾസിനെ വിജയത്തിലെത്തിച്ചത്. മത്സരത്തിന്റെ ആദ്യ പകുതിയിൽ മാനുവൽ ഉഗാർട്ടയുടെ ഓൺ ഗോളിലൂടെ സതാംപ്ടൺ ആണ് ആദ്യം ലീഡ് നേടിയത്. എന്നാൽ രണ്ടാം പകുതിയിൽ ഹാട്രിക് നേടി ഡയല്ലോ ടീമിന് ആവേശകരമായ വിജയം നൽകുകയായിരുന്നു. 

വെറും 12 മിനിറ്റുകളിൽ ആയിരുന്നു താരത്തിന്റെ ഹാട്രിക് പിറന്നത്. മത്സരത്തിൽ 86, 90, 90+4 എന്നീ മിനിറ്റുകളിലാണ് താരം ഗോൾ നേടിയത്. മൂന്ന് വർഷത്തിന് ശേഷമാണ് ഇംഗ്ലീഷ് പ്രീമിയർ ലീഗിൽ മാഞ്ചസ്റ്റർ യുണൈറ്റഡിന് വേണ്ടി ഒരു താരം ഹാട്രിക് നേടുന്നത്. 2022ൽ ക്രിസ്റ്റ്യാനോ റൊണാൾഡോയുടെ ബൂട്ടുകളിൽ നിന്നായിരുന്നു ഹാട്രിക് പിറന്നത്. റൊണാൾഡോക്ക് ശേഷം അമദ് ഡയല്ലോ ഹാട്രിക് നേടി തിളങ്ങിയത് ഏറെ ശ്രദ്ധേയമായി.

നിലവിൽ ഇംഗ്ലീഷ് പ്രീമിയർ ലീഗ് പോയിന്റ് ടേബിളിൽ പന്ത്രണ്ടാം സ്ഥാനത്താണ് മാഞ്ചസ്റ്റർ യുണൈറ്റഡ്. 21 മത്സരങ്ങളിൽ നിന്നും ഏഴു വിജയവും അഞ്ചു സമനിലയും ഒമ്പത് തോൽവിയുമായി 26 പോയിന്റാണ് മാഞ്ചസ്റ്റർ യൂണൈറ്റഡിനുള്ളത്. ജനുവരി 19ന് നടക്കുന്ന മത്സരത്തിൽ ബ്രൈറ്റൺ  ആണ് മാഞ്ചസ്റ്റർ യുണൈറ്റഡിന്റെ എതിരാളികൾ.