ഇംഫാല്‍: മണിപ്പൂരില്‍ നിതീഷ് കുമാറിന്റെ നേതൃത്വത്തിലുള്ള ജനതാദള്‍ (യുണൈറ്റഡ്) ബി.ജെ.പി സര്‍ക്കാരിനുള്ള പിന്തുണ പിന്‍വലിച്ചു. പാര്‍ട്ടിയുടെ ഏക എം.എല്‍.എ ഇനിമുതല്‍ പ്രതിപക്ഷ നിരയില്‍ ഇരിക്കുമെന്ന് പാര്‍ട്ടി വൃത്തങ്ങള്‍ അറിയിച്ചു. 

മണിപ്പൂരില്‍ സര്‍ക്കാരിന്റെ ഈ സംഭവവികാസം ഒരു തരത്തിലും ബാധിക്കില്ലെങ്കിലും, കേന്ദ്രത്തിലും ബിഹാറിലും ബി.ജെ.പിയുടെ പ്രധാന സഖ്യകക്ഷിയാണ് ജെഡിയു എന്നതിനാല്‍ ബി.ജെ.പിക്ക് ശക്തമായ ഒരു സന്ദേശമാണ് നിതീഷ് കുമാര്‍ നല്‍കുന്നത്. 

മേഘാലയയില്‍ അധികാരത്തിലുള്ള കോണ്‍റാഡ് സാങ്മയുടെ നേതൃത്വത്തിലുള്ള നാഷണല്‍ പീപ്പിള്‍സ് പാര്‍ട്ടി ബിരേന്‍ സിംഗ് സര്‍ക്കാരിനുള്ള പിന്തുണ പിന്‍വലിച്ചതിന് പിന്നാലെയാണ് ജെ.ഡി.യുവിന്റെ നടപടി.

2022ലെ നിയമസഭാ തെരഞ്ഞടുപ്പില്‍ ജെ.ഡി.യു ആറ് സീറ്റുകള്‍ നേടിയെങ്കിലും മാസങ്ങള്‍ക്ക് ശേഷം അഞ്ച് എം.എല്‍.എമാര്‍ ബി.ജെ.പിയിലേക്ക് കൂറുമാറിയിരുന്നു.  60 അംഗനിയമസഭയില്‍ ബി.ജെ.പിക്ക് 37 അംഗങ്ങളാണ് ഉള്ളത്. നാഗാ പീപ്പിള്‍സ് ഫ്രണ്ടിന്റെയും അഞ്ച് എം.എല്‍.എമാരുടെയും മൂന്ന് സ്വതന്ത്രരുടെയും പിന്തുണ നിലവില്‍ ബി.ജെ.പിക്കുണ്ട് .