നാഗ്പൂർ: ഇംഗ്ലണ്ടിനെതിരായ ആദ്യ ഏകദിനം മത്സരം നടക്കുകയാണ്. മത്സരത്തിൽ ടോസ് നേടിയ ഇംഗ്ലണ്ട് ബാറ്റിങ് തെരഞ്ഞെടുക്കുകയായിരുന്നു. ആദ്യം ബാറ്റ് ചെയ്ത ഇംഗ്ലണ്ട് 47.4 ഓവറിൽ 248 റൺസിന്‌ പുറത്തായി. മത്സരത്തിൽ ഇംഗ്ലണ്ടിനായി ഫിൽ സാൾട്ടും ബെൻ ഡക്കറ്റും ചേർന്ന് മികച്ച തുടക്കമാണ് നൽകിയത്. ഇരുവരും ചേർന്ന് 75 റൺസാണ് നേടിയത്. സാൾട്ട് 26 പന്തിൽ 43 റൺസും ബെൻ ഡക്കറ്റ് 29 പന്തിൽ 32 റൺസുമാണ് നേടിയത്. 

പിന്നീട് എത്തിയ ക്യാപ്റ്റൻ ജോസ് ബട്ലർ, ജേക്കബ് ബെഥേൽ എന്നിവർ അർദ്ധ സെഞ്ച്വറിയും നേടി. 67 പന്തിൽ 52 റൺസാണ് ബട്ലർ നേടിയത്. നാല് ഫോറുകളാണ് ഇംഗ്ലണ്ട് നായകന്റെ ബാറ്റിൽ നിന്നും പിറന്നത്. ജേക്കബ് ബെഥേൽ 64 പന്തിൽ 51 റൺസും നേടി. മൂന്ന് ഫോറുകളും ഒരു സിക്സുമാണ് താരം നേടിയത്. ഇതോടെ ഏകദിനത്തിൽ ഇന്ത്യക്കെതിരെ അർദ്ധ സെഞ്ച്വറി നേടുന്ന ഏറ്റവും പ്രായം കുറഞ്ഞ ഇംഗ്ലണ്ട് താരമായി മാറാനും ജേക്കബിന് സാധിച്ചു. തന്റെ 21ാം വയസിലാണ് താരം ഈ സ്വപ്ന നേട്ടം സ്വന്തമാക്കിയത്.

ഇതിനു മുമ്പ് ഈ നേട്ടം സ്വന്തമാക്കിയത് ഇതിഹാസ താരം ജോ റൂട്ടിന്റെ പേരിലാണ് ഉണ്ടായിരുന്നത്. 2013ൽ മൊഹാലിയിൽ നടന്ന മത്സരത്തിൽ ആയിരുന്നു റൂട്ട് ഈ നേട്ടം കൈപ്പിടിയിലാക്കിയത്. തന്റെ 22ാം വയസിലാണ് റൂട്ട് ഈ നേട്ടം കൈവരിച്ചത്. നീണ്ട 12 വർഷങ്ങൾക്ക് ശേഷമാണ് ഈ നേട്ടം സ്വന്തമാക്കിയത്. 

ഇന്ത്യൻ ബൗളിങ്ങിൽ രവീന്ദ്ര ജഡേജ, ഹർഷിദ് റാണ എന്നിവർ മൂന്ന് വിക്കറ്റുകൾ നേടി തിളങ്ങി. മുഹമ്മദ് ഷമി, അക്‌സർ പട്ടേൽ, കുൽദീപ് യാദവ് എന്നിവർ ഓരോ വിക്കറ്റും നേടി.