തിരുന്നാവായ: രാജ്യത്ത് നാല് വർഷത്തിനിടയിൽ 33,165 കോടി രൂപയുടെ സൈബർ തട്ടിപ്പ് കേസുകൾ. കഴിഞ്ഞ വർഷം 17 ലക്ഷത്തിലധികം കേസുകൾ. വൻ കുതിച്ചുചാട്ടമാണ് കേസുകളിൽ ഉണ്ടായിരിക്കുന്നത്. 2021 മുതൽ കുത്തനെ ഉയർന്നിരിക്കുകയാണ് കേസുകൾ. നാല് വർഷത്തിനിടെ 33,165 കോടി രൂപയുടെ വഞ്ചനാകുറ്റകൃത്യങ്ങളാണ് റിപ്പോർട്ട് ചെയ്തത്. നിരവധി നഗരങ്ങൾ സൈബർ കുറ്റകൃത്യങ്ങളുടെ ഹോട്ട്‌സ്‌പോട്ടുകളായി കണ്ടെത്തിയതായാണ് കേന്ദ്ര വിവര ശേഖരണത്തിലുള്ളത്.

ജാർഖണ്ഡിലെ ദിയോഘർ, രാജസ്ഥാനിലെ ദീഗ്, അൽവാർ, ജയ്പൂർ, ജോധ്പൂർ, ഹരിയാനയിലെ നൂഹ്, ഉത്തർപ്രദേശിലെ മഥുര, ഗൗതം ബുദ്ധനഗർ, പശ്ചിമ ബംഗാളിലെ കൊൽക്കത്ത, ഗുജറാത്തിലെ സൂറത്ത്, ബിഹാറിലെ നളന്ദ, നവാദ, കർണാടകയിലെ ബെംഗളൂരു, കേരളത്തിൽ കോഴിക്കോട് എന്നിവയാണ് ആഭ്യന്തര ഹോട്ട്‌സ്‌പോട്ടുകൾ. 2021ൽ 551 കോടി രൂപയും, 2022ൽ 2306 കോടിയും, 2023ൽ 27,496 കോടിയും സൈബർ കുറ്റവാളികൾ തട്ടിയെടുത്തു. 2021ൽ 1,37,254, 2022ൽ 5,15,083, 2023ൽ 11,31,649, കഴിഞ്ഞ വർഷം 17,10,505 പരാതികൾ ലഭിച്ചതായും നാഷണൽ സൈബർ റിപ്പോർട്ടിങ് പ്ലാറ്റ്‌ഫോം സമാഹരിച്ച കണക്കിൽ വ്യക്തമാക്കുന്നുണ്ട്.

സൈബർ കുറ്റകൃത്യങ്ങൾ വർധിക്കുന്നതിനിടയിൽ, ഇരകൾക്ക് എൻ.സി.ആർ.പി വഴി പരാതി നൽകാവുന്ന സംവിധാനം വികസിപ്പിക്കാനുള്ള ഒരുക്കത്തിലാണ് ആഭ്യന്തര മന്ത്രാലയം. പത്തു ലക്ഷം രൂപയോ കൂടുതലോ നഷ്ടപ്പെട്ടവർക്കാണ് ഈ സംവിധാനം ഒരുക്കുന്നത്. ഇന്ത്യൻ സൈബർ ക്രൈം കോർഡിനേഷൻ സെൻ്ററിൽ ഒന്നിലധികം ടീമുകൾ  പൊലിസുമായി ബന്ധപ്പെട്ട് പ്രവർത്തിക്കുന്നുണ്ട്. ഈ സംവിധാനത്തിലൂടെ എൻ.സി.ആർ.പി പോർട്ടലിൽ ഇ-എഫ്.ഐ.ആറിൻ്റെ ദേശസാൽകൃത സൈബർ പൊലിസ്  സ്റ്റേഷൻ സ്ഥാപിക്കുന്നതിനുള്ള ഒരുക്കത്തിലാണ്.