ഇംഗ്ലണ്ടിനെതിരായ ടെസ്റ്റ് പരമ്പരയിൽ തകർപ്പൻ പ്രകടനമാണ് ഇന്ത്യൻ നായകൻ ശുഭ്മൻ നടത്തിക്കൊണ്ടിരിക്കുന്നത്. രണ്ടാം ടെസ്റ്റിൽ രണ്ട് ഇന്നിങ്സിലും ഇന്ത്യക്കായി മികച്ച പ്രകടനമാണ് ഗിൽ നടത്തികൊണ്ടിരിക്കുന്നത്. ആദ്യ ഇന്നിങ്സിൽ ഡബിൾ സെഞ്ച്വറിയും രണ്ടാം ഇന്നിങ്സിൽ സെഞ്ച്വറി നേടിയുമാണ് ഗിൽ തിളങ്ങിയത്.

ആദ്യ ഇന്നിങ്സിൽ 387 പന്തിൽ നിന്നും 269 റൺസാണ് ഗില്ലിന്റെ ബാറ്റിൽ നിന്നും പിറന്നത്. 30 ഫോറുകളും മൂന്ന് സിക്സുകളും അടങ്ങുന്നതാണ് ഗില്ലിന്റെ ഇന്നിംഗ്സ്. രണ്ടാമത്തെ ഇന്നിങ്സിൽ  161 പന്തിൽ 162 റൺസുമാണ് ഇന്ത്യൻ നായകൻ നേടിയത്. 13 ഫോറുകളും എട്ട് സിക്സുകളുമാണ് ഗിൽ നേടിയത്. 

ഇപ്പോൾ ഗില്ലിന്റെ ഈ മികച്ച പ്രകടനങ്ങളെ പ്രശംസിച്ചിരിക്കുകയാണ് ഇന്ത്യൻ സൂപ്പർതാരം വിരാട് കോഹ്‌ലി. ഗിൽ ചരിത്രം തിരുത്തിയെഴുതുന്നു എന്നാണ് കോഹ്‌ലി തന്റെ സോഷ്യൽ മീഡിയയിൽ കുറിച്ചത്. 

''നന്നായി കളിച്ചു, സ്റ്റാർ ബോയ്. ചരിത്രം തിരുത്തിയെഴുതുന്നു. ഇവിടെ നിന്നും മുന്നോട്ട് പോവുക. ഇതെല്ലാം നീ അർഹിക്കുന്നു" കോഹ്‌ലി സോഷ്യൽ മീഡിയയിൽ കുറിച്ചു.

ഈ തകർപ്പൻ പ്രകനങ്ങൾക്ക് പിന്നാലെ ഒരുപിടി റെക്കോർഡുകളും ഗിൽ സ്വന്തമാക്കിയിരുന്നു. ഒരു ടെസ്റ്റ് മത്സരത്തിൽ ഡബിൾ സെഞ്ച്വറിയും 150+ റൺസും നേടുന്ന ചരിത്രത്തിലെ ആദ്യ താരമാണ് ഗിൽ. ഇതിന് പുറമെ  ടെസ്റ്റ് ക്രിക്കറ്റിൽ ഒരു മത്സരത്തിൽ ഇന്ത്യക്കായി ഏറ്റവും കൂടുതൽ റൺസ് നേടുന്ന താരമായും ഗിൽ മാറി. സുനിൽ ഗവാസ്കറിന്റെ 54 വർഷം പഴക്കമുള്ള റെക്കോർഡാണ് ഗിൽ തകർത്തത്. 1971ൽ വെസ്റ്റ് ഇൻഡീസിനെതിരെയുള്ള പരമ്പരയിൽ രണ്ട് ഇന്നിംഗ്സുകളിൽ നിന്നും ഗവാസ്കർ 344 റൺസാണ് നേടിയിരുന്നത്. ഈ നേട്ടമാണ് ഗിൽ മറികടന്നത്.

ഇതിനെല്ലാം പുറമെ കോഹ്‌ലിക്ക് ശേഷം ടെസ്റ്റിൽ എവേ മത്സരങ്ങളിൽ ഇരട്ട സെഞ്ച്വറി നേടുന്ന രണ്ടാമത്തെ ഇന്ത്യൻ ക്യാപ്റ്റനായും ഗിൽ മാറി. 2016ൽ ഇന്ത്യൻ ടെസ്റ്റ് ക്യാപ്റ്റനായിരിക്കെയാണ് കോഹ്‌ലി ഇരട്ട സെഞ്ച്വറി നേടിയത്. വെസ്റ്റ് ഇൻഡീസിനെതിരെയാണ് വിരാട് ഇരട്ട സെഞ്ച്വറി നേടിയിരുന്നത്. ഒമ്പത് വർഷങ്ങൾക്ക് ശേഷം ഗില്ലും ക്യാപ്റ്റനെന്ന നിലയിൽ ഈ റെക്കോർഡ് കൈപ്പിടിയിലാക്കുകയായിരുന്നു.  

അതേസമയം ഇന്ന് വിജയം ലക്ഷ്യം വെച്ചായിരിക്കും ഇന്ത്യ അവസാന ദിനത്തിൽ കളത്തിൽ ഇറങ്ങുക. 608 റൺസ് വിജയലക്ഷ്യവുമായി ഇറങ്ങിയ ഇംഗ്ലണ്ട് നിലവിൽ  72 റൺസിന്‌ മൂന്ന് വിക്കറ്റുകൾ എന്ന നിലയിലാണ്. ഇംഗ്ലണ്ടിന് വിജയിക്കാൻ ഇനി 536 റൺസ് കൂടി ആവശ്യമാണ്. ഏഴ് വിക്കറ്റ് കൂടി വീഴ്ത്തിയാൽ ഇന്ത്യക്ക് വിജയത്തിലെത്താം.  

Virat Kohli Praises Shubhman Gill Great Performance Aganist England in Test Cricket