തിരുവനന്തപുരം: രണ്ടാം പിണറായി സര്‍ക്കാരിന്റെ അവസാന സമ്പൂര്‍ണ ബജറ്റിനെ വിമര്‍ശിച്ച് പ്രതിപക്ഷ നേതാവ് വി.ഡി സതീശന്‍. സംസ്ഥാനത്തിന്റെ ധനസ്ഥിതിയെ പരിഗണിച്ചുള്ള ബജറ്റല്ലെന്ന് വിമര്‍ശിച്ച പ്രതിപക്ഷ നേതാവ് പൊള്ളയായ ബജറ്റാണ് ധനമന്ത്രി അവതരിപ്പിച്ചതെന്നും ചൂണ്ടിക്കാട്ടി. 

പ്ലാന്‍ ബി എന്നത് പ്ലാന്‍ വെട്ടി കുറക്കലാണെന്ന് ഇപ്പോള്‍ മനസിലായി. സ്‌കോളര്‍ഷിപ്പുകള്‍ പോലും വെട്ടിക്കുറച്ചു. ബാധ്യത തീര്‍ക്കാനുള്ള പണം പോലും സര്‍ക്കാരിന്റെ കയ്യിലില്ല. യാഥാര്‍ഥ്യബോധമില്ലാത്ത ബജറ്റ്. ഓര്‍ഡര്‍ ചെയ്യാതെയാണ് ബജറ്റ് അവതരിപ്പിച്ചതെന്നും പ്രതിപക്ഷ നേതാവ് വിമര്‍ശിച്ചു.

ബജറ്റിന് മുന്നോടിയായി സാമ്പത്തിക അവലോകന റിപ്പോര്‍ട്ട് സമര്‍പ്പിക്കാത്തതിനെയും പ്രതിപക്ഷ നേതാവ് വിമര്‍ശിച്ചിരുന്നു. നടപടിക്രമങ്ങളനുസരിച്ച് ബജറ്റിന് ഒരു ദിവസം മുന്‍പ് സാമ്പത്തിക അവലോകന റിപ്പോര്‍ട്ട് നല്‍കണമെന്നും എന്നാല്‍ ഇത്തവണ അത് നല്‍കിയില്ലെന്നും അദ്ദേഹം തുറന്നടിച്ചു.