അബൂദബി: സ്വീഡനിലെ ഒറെബ്രോയിലെ ഒരു വിദ്യാഭ്യാസ കേന്ദ്രത്തിലുണ്ടായ വെടിവയ്പ്പില്‍ നിരവധി പേര്‍ കൊല്ലപ്പെടുകയും നിരവധി പേര്‍ക്ക് പരുക്കേല്‍ക്കുകയും ചെയ്ത സംഭവത്തെ ശക്തമായി അപലപിച്ച് യുഎഇ.

ഇത്തരം ക്രൂര പ്രവൃത്തികളെ യുഎഇ ശക്തമായി അപലപിക്കുന്നതായും സുരക്ഷയും സ്ഥിരതയും തകര്‍ക്കാന്‍ ലക്ഷ്യമിട്ടുള്ള എല്ലാത്തരം അക്രമങ്ങളെയും  എക്കാലത്തേക്കുമായി തള്ളിക്കളയുന്നതായും വിദേശകാര്യ മന്ത്രാലയം (MoFA) ഒരു പ്രസ്താവനയില്‍ അറിയിച്ചു.

സ്വീഡനിലെ സര്‍ക്കാരിനോടും ജനങ്ങളോടും, ഈ ഹീനമായ ആക്രമണത്തിന് ഇരയായവരുടെ കുടുംബങ്ങളോടും മന്ത്രാലയം ഐക്യദാര്‍ഢ്യം പ്രകടിപ്പിച്ചു. പരുക്കേറ്റ എല്ലാവരും വേഗത്തില്‍ സുഖം പ്രാപിക്കട്ടെയെന്നും മന്ത്രാലയം ആശംസിച്ചു.

എന്താണ് സ്വീഡനില്‍ സംഭവിച്ചത്?
ചൊവ്വാഴ്ചയാണ് സ്വീഡനെ നടുക്കിയ ആക്രമണമുണ്ടായത്. രാജ്യത്തെ പ്രധാനപ്പെട്ട ഒരു വിദ്യാഭ്യാസ കേന്ദ്രത്തില്‍ നടന്ന വെടിവെപ്പില്‍ 11 പേരാണ് കൊല്ലപ്പെട്ടത്. സ്വീഡനിലെ ഏഴാമത്തെ ഏറ്റവും വലിയ നഗരമായ ഒറെബ്രൊയില്‍ വെറും ഒന്നരലക്ഷം മാത്രമാണ് ജനസംഖ്യ.

സ്റ്റോക്ക്‌ഹോമില്‍ നിന്ന് ഏകദേശം 200 കിലോമീറ്റര്‍ (125 മൈല്‍) പടിഞ്ഞാറുള്ള ഒറെബ്രോയിലാണ് വെടിവയ്പ്പ് നടന്നത്. ഔപചാരിക വിദ്യാഭ്യാസം പൂര്‍ത്തിയാക്കാത്തവരോ ഉന്നത വിദ്യാഭ്യാസം തുടരുന്നതിന് ഗ്രേഡുകള്‍ നേടാത്തവരോ ആയ മുതിര്‍ന്നവര്‍ക്കായുള്ള റിസ്‌ബെര്‍ഗ്‌സ്‌ക സ്‌കൂളിലാണ് വെടിവയ്പ്പ് നടന്നത്. കുട്ടികള്‍ക്കുള്ള സ്‌കൂളുകളും ഉള്ള ഒരു കാമ്പസിലാണ് ഇത് സ്ഥിതിചെയ്യുന്നത്. രാജ്യം കണ്ട ഏറ്റവും മാരകമായ ആക്രമാണ് ഇതെന്നും, ഇതൊരു വേദനാജനകമായ ദിവസമാണെന്നും സ്വീഡിഷ് പ്രധാനമന്ത്രി ഊള്‍ഫ് ക്രിസ്റ്റര്‍സണ്‍ പറഞ്ഞു. 

കൊല്ലപ്പെട്ടവരില്‍ അക്രമിയും ഉള്‍പ്പെട്ടിട്ടുണ്ടെന്നാണ് പുറത്തുവരുന്ന വിവരങ്ങള്‍ സൂചിപ്പിക്കുന്നത്. പ്രതി തനിച്ചാണ് ആക്രമണം നടത്തിയെന്നും അണിയറയില്‍ മറ്റാരുടെയെങ്കിലും സഹായം ലഭിച്ചോയെന്ന് അന്വേഷിച്ചു വരികയാണെന്നും പൊലിസ് അറിയിച്ചു. നിലവില്‍ തീവ്രവാദി ആക്രമാണെന്ന് പറയുക സാധ്യമല്ല എന്ന് പൊലിസ് വ്യക്തമാക്കിയിരുന്നു. കൂടുതല്‍ കാര്യങ്ങള്‍ അന്വേഷണത്തിലൂടെ വെളിപ്പെടുമെന്നാണ് കരുതപ്പെടുന്നത്.