ന്യൂഡല്‍ഹി: ഇന്ത്യയിലെ ഏറ്റവും വലിയ എസ്‌യുവി നിര്‍മാതക്കളായ മഹീന്ദ്ര തങ്ങളുടെ പുതിയ ഇലക്ട്രിക് മോഡലുകളായ BE 6 , XEV 9e  എന്നിവയുടെ ബുക്കിംഗ് ഫെബ്രുവരി 14ന് തുടങ്ങും. മാര്‍ച്ച് പകുതിയോടെ വാഹനം നിരത്തുകളില്‍ ഇറങ്ങും .ഇലക്ട്രിക് വാഹനങ്ങള്‍ക്കായി മഹീന്ദ്ര വികസിപ്പിച്ച ഇന്‍ഗ്ലോ ഇലക്ട്രിക് പ്ലാറ്റ്‌ഫോമില്‍ ആദ്യമായി ഒരുങ്ങിയിട്ടുള്ള വാഹനങ്ങളാണ് ബി.ഇ.6ഇ , എക്.ഇ.വി.9ഇയും. 

ബിഇ 6 മോഡലിന് 18.90 ലക്ഷം രൂപ മുതല്‍ 26.90 ലക്ഷം രൂപ വരെയും എക്‌സ് ഇവിക്ക് 21.90 ലക്ഷം രൂപ മുതല്‍ 30.50 ലക്ഷം രൂപ വരെയുമാണ് എക്‌സ്‌ഷോറൂം വില. പാക്ക് വണ്‍,പാക്ക് ടൂ, പാക്ക് ത്രീ എന്നീ മൂന്ന് വേരിയന്റുകളിലാണ് മഹീന്ദ്ര ബി.ഇ.6 എത്തുന്നത്. 59 കിലോവാട്ട്, 79 കിലോവാട്ട്  എന്നിങ്ങനെ രണ്ട് ബാറ്ററി ഓപ്ഷനുകളാണ് ഇരു വാഹനങ്ങളിലും നല്‍കിയിട്ടുള്ളത്,കൂടാതെ മഹീന്ദ്ര ബാറ്ററി പായ്ക്കുകള്‍ക്ക് ലൈഫ് ടൈം വാറന്റിയും നല്‍കുന്നു. 80 ശതമാനം വരെ ചാര്‍ജ് ചെയ്യാല്‍ വെറും 20 മിനിറ്റ് മതിയെന്നതാണ് മറ്റൊരു സവിശേഷത. ബിഇ 6ല്‍ 228എച്ച്പിയും രണ്ടാമത്തെതില്‍ 281 എച്ച്പിയുമാണ് കരുത്ത്. രണ്ടിലും പരമാവധി ടോര്‍ക്ക് 380എന്‍എം. 59 കീലോവാട്ട്  ബാറ്ററി പാക്ക് നല്‍കിയിട്ടുള്ള എക്‌സ്ഇ.വി.9ഇ ഒറ്റത്തവണ ചാര്‍ജ്ജില്‍ 542 കിലോമീറ്ററും 79 കീലോവാട്ട് ബാറ്ററി പാക്ക് മോഡല്‍ 656 കിലോമീറ്റര്‍ റേഞ്ചും നല്‍കുമെന്നാണ് നിര്‍മ്മാതാക്കള്‍ അവകാശപ്പെടുന്നത്.ബി.ഇ.6 മോഡല്‍ 556 കിലോമീറ്ററും 682 കിലോമീറ്ററുകളുമായാണ് എത്തുക.

റിയര്‍ വീല്‍ ഡ്രൈവില്‍ ലഭ്യമായ ഹൈ-സ്‌പെക്ക് മോഡലിന് വെറും 6.7 സെക്കന്‍ഡിനുള്ളില്‍ 0-100km/h വേഗത കൈവരിക്കാന്‍ കഴിയും. റേഞ്ച്,എവരിഡേ,റേസ് എന്നീ മൂന്ന് ഡ്രൈവിംഗ് മോഡുകളും ബൂസ്റ്റ് മോഡും വാഹനം വാഗ്ദാനം നല്‍കുന്നു. 

ഇന്ത്യയിലെ മറ്റ് ഇലക്ട്രിക് വാഹനങ്ങളെ അപേക്ഷിച്ച് റേഞ്ചില്‍ മുന്നില്‍ നില്‍ക്കുന്ന വാഹനങ്ങളാണ് മഹീന്ദ്ര ഇപ്പോള്‍ പുറത്തിറക്കിയിരിക്കുന്നത്.