അബൂദബി: രാജ്യത്ത് വര്‍ധിച്ചുവരുന്ന ഓണ്‍ലൈന്‍ തട്ടിപ്പുകളെക്കുറിച്ച് യുഎഇ നിവാസികള്‍ക്ക് മുന്നറിയിപ്പ് നല്‍കി അബൂദബി പൊലിസ്. സാമ്പത്തിക നേട്ടം വാഗ്ദാനം ചെയ്ത് ഇരകളെ പാട്ടിലാക്കാന്‍ തട്ടിപ്പുകാര്‍ വഞ്ചനാപരമായ തന്ത്രങ്ങള്‍ പ്രയോഗിക്കുന്നതായി അബൂദബി പൊലിസ് പറഞ്ഞു.

വ്യക്തികള്‍ക്ക് സംശയം തോന്നാതിരിക്കാന്‍ കുറ്റവാളികള്‍ കൂടുതല്‍ കൂടുതല്‍ സങ്കീര്‍ണ്ണമായ രീതികള്‍ ഉപയോഗിച്ചാണ് ചൂഷണം നടത്തുന്നതെന്നും പൊലിസ് വെളിപ്പെടുത്തി.

നിയമ നിര്‍വ്വഹണ സേവനങ്ങള്‍ വിപുലീകരിക്കുന്നതിനും കുറ്റകൃത്യങ്ങള്‍ തടയുന്നതിനുള്ള സംരംഭങ്ങള്‍ വര്‍ധിപ്പിക്കുന്നതിനും ദേശീയ സുരക്ഷയും സ്വത്തുക്കളും സംരക്ഷിക്കുന്നതിനായി പൊതുജന അവബോധം വളര്‍ത്തുന്നതിനുമുള്ള അബൂദബി പൊലിസിന്റെ നിരന്തരമായ പ്രതിബദ്ധത ക്രിമിനല്‍ സുരക്ഷാ മേഖല ഡയറക്ടര്‍ മേജര്‍ ജനറല്‍ മുഹമ്മദ് സുഹൈല്‍ അല്‍ റാഷിദി ആവര്‍ത്തിച്ചു. സുരക്ഷ ശക്തിപ്പെടുത്തുന്നതിലും കുറ്റകൃത്യങ്ങള്‍ തടയുന്നതിനും കൂടുതല്‍ പദ്ധതികള്‍ ആവിഷ്‌കരിക്കുമെന്നും അദ്ദേഹം പറഞ്ഞു.

വ്യാജ ട്രേഡിംഗ് പ്ലാറ്റ്‌ഫോമുകള്‍ ഉള്‍പ്പെടെയുള്ള തട്ടിപ്പുകളുടെ ഉദാഹരണങ്ങള്‍ മേജര്‍ ജനറല്‍ അല്‍ റാഷിദി ചൂണ്ടിക്കാട്ടി. നിയമസാധുതയെക്കുറിച്ചുള്ള ഒരു ബോധം സൃഷ്ടിക്കാന്‍ തട്ടിപ്പുകാര്‍ പലപ്പോഴും പ്രൊഫഷണലായി തോന്നിക്കുന്ന പരസ്യങ്ങള്‍ ഉപയോഗിക്കുന്നു. തുടക്കത്തില്‍ കൂടുതല്‍ നിക്ഷേപങ്ങള്‍ പ്രോത്സാഹിപ്പിക്കുന്നതിനായി വ്യാജ ലാഭം കാണിക്കും. പിന്നീട്, ഇരകള്‍ അവരുടെ പണം പിന്‍വലിക്കാന്‍ ശ്രമിക്കുമ്പോഴാണ് തങ്ങള്‍ പറ്റിക്കപ്പെട്ട വിവരം ഇവര്‍ അറിയുന്നത്.

ഇന്‍ഷുറന്‍സ് ദാതാക്കള്‍, റെസ്റ്റോറന്റുകള്‍, റീട്ടെയിലര്‍മാര്‍ തുടങ്ങിയ പ്രശസ്ത കമ്പനികളുടെ പേരില്‍ വ്യാജ വെബ്‌സൈറ്റുകള്‍ ഉയര്‍ത്തുന്ന വര്‍ധിച്ചുവരുന്ന ഭീഷണിയും അദ്ദേഹം എടുത്തുപറഞ്ഞു. ക്രെഡിറ്റ് കാര്‍ഡുകള്‍ ഉപയോഗിച്ച് ഒരു ഇടപാട് നടത്തിക്കഴിഞ്ഞാല്‍, ഇരകളുടെ അക്കൗണ്ടുകളില്‍ നിന്ന് പണം മോഷ്ടിക്കാന്‍ തട്ടിപ്പുകാര്‍ക്ക് വളരെ എളുപ്പത്തില്‍ സാധിക്കും. 

വ്യാജ തൊഴില്‍ റിക്രൂട്ട്‌മെന്റ് പേജുകളോ സോഷ്യല്‍ മീഡിയ പ്രോഗ്രാമുകളോ സൃഷ്ടിച്ച്, നിലവിലില്ലാത്ത തസ്തികകള്‍ക്ക് അപേക്ഷകരില്‍ നിന്ന് പണം ഈടാക്കാന്‍ തട്ടിപ്പുകാര്‍ സാധ്യതയുള്ളതിനാല്‍, പ്രത്യേകിച്ച് ഔദ്യോഗിക ഉത്തരവുകളെപ്പോലെ തോന്നിക്കുന്ന അറിയിപ്പുകളില്‍ ജാഗ്രത പാലിക്കണമെന്ന് അബൂദബി പൊലിസ് പൊതുജനങ്ങളോട് അഭ്യര്‍ത്ഥിച്ചു. 

ഫോണ്‍ തട്ടിപ്പുകള്‍, ബ്ലാക്ക്‌മെയില്‍ അല്ലെങ്കില്‍ മറ്റ് തരത്തിലുള്ള സൈബര്‍ തട്ടിപ്പുകള്‍ക്ക് ഇരയാകാതിരിക്കാന്‍ ഇന്റര്‍നെറ്റ്, സ്മാര്‍ട്ട്‌ഫോണ്‍ ഉപയോക്താക്കള്‍ അവരുടെ സ്വകാര്യ വിവരങ്ങള്‍ സംരക്ഷിക്കണമെന്ന് പൊലിസ് മുന്നറിയിപ്പ് നല്‍കി.

തട്ടിപ്പിന് ഇരയായവര്‍ അടുത്തുള്ള പൊലിസ് സ്റ്റേഷനില്‍ സംഭവം റിപ്പോര്‍ട്ട് ചെയ്യുകയോ അല്ലെങ്കില്‍ അബൂദബി പൊലിസിന്റെ സ്മാര്‍ട്ട് ആപ്ലിക്കേഷന്റെ 'പൊലിസ് സ്റ്റേഷന്‍ ഇന്‍ യുവര്‍ ഫോണ്‍' സേവനം ഉപയോഗിക്കുകയോ ചെയ്യണം.

സംശയാസ്പദമായതോ വഞ്ചനാപരമായതോ ആയ എന്തെങ്കിലും പ്രവര്‍ത്തനങ്ങള്‍ ശ്രദ്ധയില്‍പ്പെട്ടാല്‍, വഞ്ചനയെ ചെറുക്കുന്നതിനും സമൂഹത്തെ സംരക്ഷിക്കുന്നതിനും സഹായിക്കുന്നതിന് വ്യക്തികള്‍ ഉടന്‍ തന്നെ 8002626 എന്ന ഹോട്ട്‌ലൈന്‍ നമ്പറില്‍ ബന്ധപ്പെടുകയോ 2828 എന്ന നമ്പറില്‍ സന്ദേശം അയയ്ക്കുകയോ [email protected] എന്ന ഇമെയില്‍ വിലാസത്തില്‍ ബന്ധപ്പെടുകയോ വേണം.