മസ്‌കത്ത്: ഒമാനില്‍ നാലുപേരുടെ ജീവനെടുത്ത വാഹനാപകടത്തിന് കാരണക്കാരനായ ഇന്ത്യന്‍ ഡ്രൈവര്‍ക്ക് രണ്ടു വര്‍ഷം കഠിനതടവ്. ശിക്ഷാ കാലാവധിക്ക് ശേഷം ഇയാളെ ഒമാനില്‍ നിന്ന് നാടുകടത്തും. ഒമാനിലെ ലിവയില്‍ കഴിഞ്ഞ വര്‍ഷം മേയ് മാസത്തിലാണ് നാലു പേരുടെ ജീവനെടുത്ത അപകടം സംഭവിച്ചത്. അപകടത്തില്‍ 15 പേര്‍ക്ക് പരുക്കേല്‍ക്കുകയും ചെയ്തിരുന്നു. ഡ്രൈവറായിരുന്ന മുഹമ്മദ് ഫറാസ് അമിതവേഗത്തില്‍ എതിര്‍ ദിശയില്‍ ട്രക്ക് ഓടിച്ചതാണ് വലിയ ദുരന്തത്തിന് കാരണമായതെന്ന് അന്വേഷണത്തില്‍ തെളിഞ്ഞിരുന്നു.

അന്വേഷണത്തില്‍ ഡ്രൈവര്‍ കുറ്റക്കാരനാണ് എന്ന് കണ്ടെത്തിയതിനെ തുടര്‍ന്നാണ് വടക്കന്‍ ബാത്തിന ഗവര്‍ണറേറ്റിലെ ലിവ വിലായത്തിലെ പ്രാഥമിക കോടതി വിധി പുറപ്പെടുവിച്ചത്. ജീവനും സ്വത്തിനും അപകടമുണ്ടാക്കുന്ന രീതിയില്‍ പ്രതി  അമിത വേഗത്തില്‍ വാഹനമോടിച്ചെന്നും എതിര്‍ദിശയില്‍ വാഹനം ഓടിച്ച് മനഃപൂര്‍വ്വം അപകടമുണ്ടാക്കിയെന്നും കോടതി നിരീക്ഷിച്ചു.

ആദ്യ കുറ്റത്തിന് രണ്ടു വര്‍ഷവും രണ്ടാമത്തെ കുറ്റത്തിന് മൂന്ന് മാസത്തെ തടവുമാണ് കോടതി വിധിച്ചത്. ശിക്ഷകള്‍ ഒരുമിച്ച് അനുഭവിച്ചാല്‍ മതിയാകും. ഇയാളുടെ ഡ്രൈവിംഗ് ലൈസന്‍സ് ഒരു വര്‍ഷത്തേക്ക് റദ്ദാക്കാനും അറബിയിലും ഹിന്ദിയിലും വിധി പ്രസിദ്ധീകരിക്കാനും ലിവ വിലായത്തിലെ പ്രാഥമിക കോടതി ഉത്തരവിട്ടു. ശിക്ഷാ കാലാവധിക്ക് ശേഷം ഒമാനില്‍നിന്ന് സ്ഥിരമായി നാടുകടത്തണമെന്നും കോടതി ഉത്തരവിട്ടു.