മനാമ: പ്രവാസി തൊഴിലാളികള്‍ക്ക് ആറ് മാസത്തെ വര്‍ക്ക് പെര്‍മിറ്റ് ഏര്‍പ്പെടുത്തി ബഹ്‌റൈന്‍ ലേബര്‍ മാര്‍ക്കറ്റ് റെഗുലേറ്ററി അതോറിറ്റി. ലേബര്‍ മാര്‍ക്കറ്റ് റെഗുലേറ്ററി അതോറിറ്റിയുടെ തീരുമാനത്തെ ഒത്തിരി പ്രതീക്ഷയോടെയാണ് പ്രവാസി സമൂഹം നോക്കിക്കാണുന്നത്. അതോറിറ്റിയുടെ തീരുമാനം തൊഴിലുടമകള്‍ക്കും തൊഴിലാളികള്‍ക്കും ഒരുപോലെ പ്രയോജനകരാമകുമെന്നാണ് തൊഴിലാളി സമൂഹം കരുതുന്നത്. 

തൊഴിലവസരങ്ങള്‍ വിപുലീകരിക്കുന്നതിന്റെ ഭാഗമായും കൂടുതല്‍ തൊഴിലാളികള്‍ക്ക് തൊഴില്‍ നല്‍കാനും ലക്ഷ്യമിട്ടാണ് നിലവിലുള്ള രണ്ടു വര്‍ഷത്തെയും ഒരു വര്‍ഷത്തെയും വര്‍ക്ക് പെര്‍മിറ്റിനു പുറമേ ആറ് മാസത്തെ വര്‍ക്ക് പെര്‍മിറ്റ് കൂടി ബഹ്‌റൈന്‍ അവതരിപ്പിച്ചിരിക്കുന്നത്.

പുതിയ നീക്കമനുസരിച്ച് തൊഴിലുടമകള്‍ക്ക് തങ്ങളുടെ ആവശ്യങ്ങള്‍ക്കനുരിച്ച് തൊഴിലാളികളെ പെട്ടെന്ന് നിയമിക്കാനാകും. വ്യത്യസ്ത തൊഴില്‍സാഹചര്യങ്ങള്‍ക്കനുസരിച്ച ജീവനക്കാരെ നിയമിക്കാനും ബിസിനസ് സ്ഥാപനങ്ങള്‍ക്ക് പ്രവര്‍ത്തന മേഖലകളിലെ ചെലവുകള്‍ ഗണ്യമായി കുറയ്ക്കാനും കൂടുതല്‍ ലാഭകരമായ രീതിയില്‍ പ്രവര്‍ത്തിക്കാനും ലേബര്‍ അതോറിറ്റിയുടെ പുതിയ വര്‍ക്ക് പെര്‍മിറ്റ് സംവിധാനം സഹായകമാകുമെന്നാണ് അധികൃതരും കരുതുന്നത്.

ബഹ്‌റൈനിലെ വിവിധ വ്യവസായങ്ങള്‍,  മൈക്രോ സ്മാള്‍ ആന്റ് മീഡിയം ബിസിനസുകള്‍, സാങ്കേതിക മേഖലകള്‍, വിനോദസഞ്ചാര മേഖലകള്‍ എന്നിവയില്‍ ശ്രദ്ധ കേന്ദ്രീകരിക്കുന്ന കമ്പനി ഉടമകള്‍ക്ക് പുതിയ വര്‍ക്ക് പെര്‍മിറ്റ് വലിയ രീതിയില്‍ ഗുണം ചെയ്യാനിടയുണ്ട്. കുറഞ്ഞ കാലാവധിയുള്ള വര്‍ക്ക് പെര്‍മിറ്റുകള്‍, തൊഴിലാളികളുടെ തൊഴില്‍ നൈപുണ്യം ഉയര്‍ത്തുന്നതിന് പ്രേരണയാകുമെന്നാണ് വിദഗ്ധര്‍ പറയുന്നത്.

ആറു മാസത്തെ വര്‍ക്ക് പെര്‍മിറ്റ് ബഹ്‌റൈനില്‍ താമസിക്കുന്ന പ്രവാസികള്‍ക്ക് മാത്രമുള്ളതാണെന്നും വിദേശത്തു നിന്നുള്ള തൊഴില്‍ അന്വേഷകര്‍ക്ക് ഇത് അനുവദിച്ചിട്ടില്ലെന്നും വിശദീകരിച്ചിരിക്കുന്ന സാഹചര്യത്തില്‍ ബഹ്‌റൈനിലെ തൊഴഇലാളികളായ പ്രവാസികള്‍ സന്തോഷത്തിലാണ്. 50 ദിനാര്‍ വര്‍ക്ക് പെര്‍മിറ്റ് ഫീസും ഹെല്‍ത്ത് ഇന്‍ഷുറന്‍സ് പാക്കേജ് കൂടി ഉള്‍പ്പെടുത്തി ആകെ 86 ദിനാര്‍ ആണ് ആറുമാസത്തെ വിസ നിരക്ക്.

Bahrain introduced a six-month work permit for expatriates, only 86 dinars for a six-month permit