കൊച്ചി: ടൂറിസം ആവശ്യങ്ങൾക്കായുള്ള റോയൽ വ്യൂ മുന്നാർ ഡബിൾ ഡെക്കർ ബസ് യാതൊരു നിയമവും ലംഘിക്കാതെയാണ് സർവീസ് നടത്തി വരുന്നതെന്ന് കെഎസ്ആർടിസി ഹൈക്കോടതിയെ അറിയിച്ചു. ഇരുനില ബസിന് എൽഇഡി ബൾബുകൾ ഉൾപ്പെടെയുള്ള പ്രകാശസംവിധാനം ഏർപ്പെടുത്തി രൂപമാറ്റം വരുത്തിയതിൽ ഹൈക്കോടതി സ്വമേധയാ എടുത്ത കേസിലാണ് കെഎസ്ആർടിസി സത്യവാങ്മൂലം നൽകിയിരിക്കുന്നത്. സമൂഹ മാധ്യമങ്ങളിൽ കാണുന്ന വിശദാംശങ്ങളുടെ അടിസ്‌ഥാനത്തിൽ കെഎസ്ആർടിസി വിഷയത്തെ പരിഗണിക്കരുതെന്നും സത്യവാങ്മൂലത്തിൽ പറയുന്നുണ്ട്. നേരത്തെ ഇരുനില ബസിൽ രൂപമാറ്റം വരുത്തിയതിനെതിരെ ഹൈക്കോടതി രുക്ഷമായി വിമർശിച്ചിരുന്നു. മറ്റു വാഹനയാത്രക്കാരുടെ സുരക്ഷയെ പോലും വെല്ലുവിളിക്കുന്നതാണ് ബസിലെ പ്രകാശ സംവിധാനം എന്ന് ചുണ്ടിക്കാട്ടിയായിരുന്നു കോടതി വിമർശിച്ചത്.

കേസ് നാളെ പരിഗണിക്കാനിരിക്കെയാണ് തങ്ങൾ ഒരു നിയമലംഘനവും നടത്തിയിട്ടില്ലെന്ന് കെഎസ്ആർടിസി  ഹൈക്കോടതിയിൽ വ്യക്തമാക്കിയിട്ടുള്ളത്. ബന്ധപ്പെട്ട മോട്ടർ വാഹന വകുപ്പ് ഉദ്യോഗസ്ഥനെ നിയോഗിച്ചാൽ ഇക്കാര്യങ്ങൾ കോടതിക്കു വ്യക്ത‌മായി മനസ്സിലാക്കാനാവും. ഇത്തരം സാങ്കേതിക കാര്യങ്ങൾ ചികഞ്ഞു കോടതിയുടെ വിലപ്പെട്ട സമയം നഷ്‌ടപ്പെടുത്തരുത്. അത്തരം വിശദാംശങ്ങൾ ലഭിക്കുന്നതിന് കോടതിക്ക് ഒരു അമിക്കസ് ക്യൂറിയെ നിയോഗിക്കാവുന്നതാണെന്നും കെഎസ്ആർടിസി അറിയിച്ചു.

1965 മുതൽ കെഎസ്‌ആർടിസി സംസ്‌ഥാനത്ത് ഇരുനില ബസുകൾ സർവീസ് നടത്തി വരുന്നുണ്ട്. ടൂറിസം ആവശ്യങ്ങൾക്കായി സംസ്ഥാന സർക്കാരിന്റെ നിയമപരമായ അനുമതി വാങ്ങിയാണ് ബസിന്റെ വശങ്ങളിൽ ഗ്ലാസുകൾ പിടിപ്പിക്കുന്നത് അടക്കമുള്ള രൂപമാറ്റം വരുത്തിയത്. സുരക്ഷയുടെ കാര്യത്തിൽ യാതൊരു വിട്ടുവീഴ്ചയും ഇതുവരെ കെഎസ്‌ആർടിസി  ചെയ്‌തിട്ടില്ല. ഇത്തരം പ്രദേശങ്ങളിൽ ഈ ബസുകൾ ഓടിക്കുന്നതിന് വിദഗ്‌ധരായ ഡ്രൈവർമാർ കെഎസ്ആർടിസിക്കുണ്ട്. ഹെഡ്‌ലൈറ്റും എൽഇഡി ലൈറ്റുകളുമായി ബന്ധപ്പെട്ട് കോടതി ചുണ്ടിക്കാട്ടിയ പിഴവുകൾ തിരുത്തിയെന്നും സത്യവാങ്മൂലത്തിൽ വ്യക്തമാക്കുന്നുണ്ട്.