കോഴിക്കോട്: നാദാപുരത്ത് യൂത്ത് ലീഗ് പ്രവര്‍ത്തകന്‍ മുഹമ്മദ് അസ്‌ലമിനെ വെട്ടിക്കൊലപ്പെടുത്തിയ കേസില്‍ രണ്ട് സി.പി.എം പ്രവര്‍ത്തകര്‍ കൂടി അറസ്റ്റിലായി. വെള്ളൂര്‍ സ്വദേശികളായ ജിതേഷ്, ഷാജി എന്നിവരാണ് അറസ്റ്റിലായത്. അസ് ലമിനെ വധിക്കാന്‍ ഗൂഢാലോചന നടത്തിയെന്ന കുറ്റത്തിനാണ് ഇവരെ അറസ്റ്റ് ചെയ്തത്.

കൊലയാളി സംഘത്തിന് വഴി കാണിച്ചുകൊടുത്തത് ഇവരാണെന്ന് അന്വേഷണ സംഘം കണ്ടെത്തിയിട്ടുണ്ട്. ഇവര്‍ സഞ്ചരിച്ചിരുന്ന ബൈക്കും കാറും പോലീസ് കണ്ടെത്തി. 

ഓഗസ്റ്റ് 11 നാണ് അസ്‌ലം വെട്ടേറ്റു മരിച്ചത്. സുഹൃത്തുക്കള്‍ക്കൊപ്പം ബൈക്കില്‍ സഞ്ചരിക്കുമ്പോഴാണ് അസ്‌ലമിനെ ഒരു സംഘമാളുകള്‍ കൊലപ്പെടുത്തിയത്. ഇതുവരെ കേസില്‍ അഞ്ചു പേരെയാണ് പിടികൂടിയത്.