പത്തനംതിട്ട: ആശാവര്‍ക്കര്‍മാരുടെ സമരസമിതി നേതാവ് എസ്. മിനിക്കെതിരെ അധിക്ഷേപ പരാമര്‍ശവുമായി സി.ഐ.ടി.യു സംസ്ഥാന വൈസ് പ്രസിഡന്റ് പി.ബി ഹര്‍ഷകുമാര്‍. മിനി സാംക്രമിക രോഗം പരത്തുന്ന കീടമാണെന്നായിരുന്നു അധിക്ഷേപം. 

 ''സമരത്തിന്റെ ചെലവില്‍ കുറേ ദിവസമായി തിരുവനന്തപുരത്ത് കഴിഞ്ഞു കൂടുകയാണ്. കേരളത്തിലെ ബസ്റ്റാന്‍ഡുകളുടെ മുമ്പില്‍ പാട്ട കുലുക്കി പിരിവ് നടത്തുന്ന പാര്‍ട്ടിയാണ് സമരത്തിന് പിന്നിലെന്നും  അതിന്റെ നേതാവാണ് മിനിയെന്നും ഹര്‍ഷകുമാര്‍ ആരോപിച്ചു. 

വി.എസ് അച്യുതാനന്ദന്റെ ഭരണകാലത്താണ് 300 രൂപയില്‍ നിന്ന് ഓണറേറിയം 500 രൂപയാക്കി ഉയര്‍ത്തിയത്. അത് 1000 രൂപയാക്കി ഉയര്‍ത്തണമെന്ന് ആവശ്യപ്പെട്ട് വീണ്ടും സമരം നടന്നു. അപ്പോഴൊന്നും ഈ പാട്ട കുലുക്കി പാര്‍ട്ടിയെ എങ്ങും കണ്ടില്ലെന്നും ഹര്‍ഷകുമാര്‍ പറഞ്ഞു.

തന്നെ നികൃഷ്ട ജീവിയെന്ന് വിളിച്ചില്ലല്ലോ എന്നതില്‍ ആശ്വാസമുണ്ടെന്ന് മിനി പ്രതികരിച്ചു. ആശാ വര്‍ക്കര്‍മാരുടെ സമരത്തോടെ സിഐടിയുവിന്റെ ആണിക്കല്ല് ഇളകി. ആക്ഷേപങ്ങള്‍ക്ക് പൊതുജനം മറുപടി നല്‍കുമെന്നും ആശ സമരസമിതി നേതാവ് എസ് മിനി പ്രതികരിച്ചു. 51 വെട്ടൊക്കെയാണ് പതിവു രീതി. അത് തനിക്ക് നേരെ ഉണ്ടായില്ല എന്നതില്‍ സന്തോഷമുണ്ടെന്നും മിനി പറഞ്ഞു.