നാഗ്പൂർ: രഞ്ജി ട്രോഫി ഫൈനലിന്റെ നാലാം ദിവസം അവസാനിച്ചിരിക്കുകയാണ്. നാലാം ദിനം കളി നിർത്തുമ്പോൾ വിദർഭ രണ്ടാം ഇന്നിങ്സിൽ നാല് വിക്കറ്റ് നഷ്ടത്തിൽ 249 റൺസ് എന്ന നിലയിലാണ്. നിലവിൽ വിദർഭയുടെ ലീഡ് 256 റൺസിലേക്ക് കടന്നിരിക്കുകയാണ്. ലീഡ് നേടിയതിന്റെ മുൻ തൂക്കത്തിൽ ഇനി മത്സരം സമനില ആയാൽ പോലും വിദർഭക്ക്‌ കിരീടം സ്വന്തമാക്കാം. ഇനി ഫൈനലിൽ ഒരു ദിവസം മാത്രമേ ബാക്കിയുള്ളൂ. അതുകൊണ്ട് തന്നെ കേരളത്തിന്റെ രഞ്ജി കിരീട പ്രതീക്ഷകളും അസ്തമിച്ചിരിക്കുകയാണ്. 

രണ്ടാം ഇന്നിങ്സിൽ വിദർഭയ്ക്ക് വേണ്ടി മലയാളി താരം കരുൺ നായർ സെഞ്ച്വറി നേടി ക്രീസിൽ തുടരുകയാണ്. 250 പന്തിൽ 132 റൺസ് നേടിയാണ് കരുൺ ക്രീസിൽ നിലയുറപ്പിച്ചിരിക്കുന്നത്. 10 ഫോറുകളും രണ്ട് സിക്സുകളും ആണ് ഇതുവരെ താരം നേടിയിട്ടുള്ളത്. ഡാനിഷ് മാലേവാർ അർദ്ധ സെഞ്ച്വറിയും നേടി മികച്ചു നിന്നു. 162 പന്തിൽ അഞ്ചു ഫോറുകൾ ഉൾപ്പെടെ 73 റൺസാണ് താരം നേടിയത്. കേരളത്തിനു വേണ്ടി ഇതുവരെ എംഡി നിതീഷ്, ജലജ് സക്സേന, അക്ഷയ് ചന്ദ്രൻ, ആദിത്യ സാർവതേ എന്നിവർ ഓരോ വിക്കറ്റ് വീതം നേടി.

ഒന്നാം ഇന്നിങ്സിൽ 342 റൺസിനാണ് കേരളം പുറത്തായത്. ക്യാപ്റ്റൻ സച്ചിൻ ബേബി 98 റൺസ് നേടി മികച്ച പ്രകടനം നടത്തി. 10 ഫോറുകൾ ആയിരുന്നു സച്ചിൻ നേടിയത്.  ആദിത്യ സാർവതെ 185 പന്തിൽ 79 റൺസും അഹമ്മദ് ഇമ്രാൻ 83 പന്തിൽ 37 റൺസും മുഹമ്മദ് അസ്ഹുദീൻ 59 പന്തിൽ 34 റൺസും നേടി. വിദർയുടെ ബൗളിങ്ങിൽ രേഖാഡെ, ഹർഷ് ദുബെ, ദാർശൻ നാൽക്കണ്ടെ എന്നിവർ മൂന്ന് വീതം വിക്കറ്റുകൾ നേടി തിളങ്ങി. യാഷ് താക്കൂർ ഒരു വിക്കറ്റും സ്വന്തമാക്കി.

അതേസമയം ഒന്നാം ഇന്നിങ്സിൽ ബാറ്റ് ചെയ്ത വിദർഭ 379 റൺസിനാണ് പുറത്തായത്. ഡാനിഷ് മാലേവാറിന്റെ സെഞ്ച്വറി കരുത്തിലാണ് വിദർഭ മികച്ച സ്കോർ സ്വന്തമാക്കിയത്. 285 പന്തിൽ 153 റൺസാണ് താരം നേടിയത്. 15 ഫോറുകളും മൂന്ന് സിക്സുകളും അടങ്ങുന്നതായിരുന്നു മാലേവാറിന്റെ ഇന്നിങ്‌സ്. കരുൺ നായർ അർദ്ധ സെഞ്ച്വറിയും നേടി മികച്ച പ്രകടനം നടത്തി. എട്ട് ഫോറുകളും ഒരു സിക്‌സും അടക്കം 188 പന്തിൽ 86 റൺസാണ് കരുൺ നേടിയത്. 

കേരളത്തിനായി ഏദൻ ആപ്പിൾ ടോം, എംഡി നിതീഷ് എന്നിവർ ഓരോ വിക്കറ്റുകൾ നേടി തിളങ്ങി. നെടുമൻകുഴി ബേസിൽ രണ്ട് വിക്കറ്റും ജലജ് സക്‌സേന ഒരു വിക്കറ്റും സ്വന്തമാക്കി.