ന്യൂഡൽഹി: രാജ്യത്തിന്റെ സാമ്പത്തിക മാനേജ്മെന്റിനെതിരെ രൂക്ഷവിമർശനവുമായി രാഹുൽ ഗാന്ധി. മോദി സർക്കാരിന്റെ ഭരണകാലത്ത് വൻതോതിൽ "നിർമ്മിക്കപ്പെട്ടത്" സാമ്പത്തിക പരാജയവും, തൊഴിലില്ലായ്മയും, പണപ്പെരുപ്പവും, നുണകളും മാത്രമാണെന്ന് അദ്ദേഹം ആരോപിച്ചു.

"അന്യായമായ നികുതികൾ നീക്കം ചെയ്യുക, കുത്തക അധികാരം അവസാനിപ്പിക്കുക, ബാങ്കുകളെ പൊതുജനങ്ങൾക്ക് ആക്സസിബിൾ ആക്കുക, കഴിവുള്ളവർക്ക് അവകാശങ്ങൾ നൽകുക—ഇവയിലൂടെ മാത്രമേ രാജ്യത്തിന്റെ സമ്പദ്‌വ്യവസ്ഥക്കും തൊഴിലവസരങ്ങൾക്കും മുന്നേറ്റമുണ്ടാകുകയുള്ളൂ!" രാഹുൽ ഗാന്ധി ഫേസ്ബുക്ക് പോസ്റ്റിൽ വ്യക്തമാക്കി.

സർക്കാരിന്റെ സാമ്പത്തിക നയങ്ങൾ സാധാരണ ജനങ്ങളെ ഗുരുതരമായി ബാധിക്കുകയാണെന്ന് ആരോപിച്ച് കോൺഗ്രസ് നിരന്തരം വിമർശനം ഉന്നയിക്കുന്നു. വിലക്കയറ്റം, സ്വകാര്യ നിക്ഷേപത്തിലെ കുറവ്, വേതന സ്തംഭനം എന്നിവ രാജ്യത്തെ തൊഴിൽ വിപണിയെ ദുർബലമാക്കുന്നുവെന്നും പാർട്ടി ചൂണ്ടിക്കാട്ടുന്നു.

ഉപഭോഗ ചെലവിന്റെ കുറവും സമ്പത്ത് അസമത്വവുമാണ് പ്രധാനപ്പെട്ട വിഷയങ്ങൾ. ഈ പ്രതിസന്ധിയിൽ നിന്ന് രക്ഷപ്പെടാനുള്ള മാർ​ഗം പടിപടിയായി സാമ്പത്തിക ശക്തീകരണം നടപ്പിലാക്കണമെന്നും ഗ്രാമീണ വരുമാനം ഉയർത്തിയുള്ള നടപടികൾ സ്വീകരിക്കണമെന്നും കോൺഗ്രസ് ആവശ്യപ്പെട്ടു.